Semeytany.kz – Абай облысының әкімі Берік Уәлидің төрағалығымен өткен әкімдік отырысында жол жөндеу жұмыстарының барысы жан-жақты талқыланды. Жиында республикалық, облыстық және аудандық маңызы бар жолдардағы құрылыс пен жөндеу жұмыстарының кестеден кешігіп жатқандығы айтылды.
Облыстың Жолаушылар көлігі және автомобиль жолдары басқармасының басшысы Асхат Есеев пен «ҚазАвтоЖол» ҰК» АҚ облыстық филиалының директоры Айбек Әнуарбеков өңірдегі жол инфрақұрылымының қазіргі жай-күйін баяндады. Биыл жергілікті маңызы бар 391 шақырым жол мен елді мекен көшелерін жөндеуге 30,4 млрд теңге бөлінген. Оның ішінде «Ауыл – ел бесігі» бағдарламасы бойынша 63,3 шақырым болатын 23 көшеге орташа жөндеу жүргізілуде.
Алайда бірқатар аудандарда жұмыс кестесінен кешігу байқалады. Осыған байланысты облыс әкімі жауапты тұлғалардың — аудан әкімдері мен басқарма өкілдерінің жауапкершілігін қарастыруды тапсырды.
– Аудандарға барғанда ең бірінші көтерілетін мәселе – жол. Халықпен кездескенде де, әлеуметтік желідегі пікірлерде де осы мәселе жиі айтылады. Жол сапасы – күн тәртібінен түспейтін тақырып. Әр әкім өз аумағындағы жолды жеке бақылауға алуы тиіс, – деді Берік Уәли.
Сондай-ақ жиында «Талдықорған–Қалбатау–Өскемен» және «Омбы–Майқапшағай» бағыттарындағы автожолдарды қайта жаңғырту жұмыстарының барысы айтылды. Биыл облыс аумағындағы «Семей–Қайнар», «Қарағанды–Аягөз–Тарбағатай–Боғас», «Өскемен–Семей», «Таскескен–Бақты» бағыттарында 250 шақырым жолға асфальт төселмек.
Жиында медициналық сақтандыру жүйесінің жүзеге асырылу барысы да сөз болды. Облыс тұрғындарының 83 пайыздан астамы сақтандырылған. Жыл басынан бері тұрғындармен 100-ден астам түсіндіру кездесуі, 4000-нан астам жеке кеңес ұйымдастырылған. Облыс әкімі бұл жұмыстарды күшейту қажет екенін атап өтті.
Сонымен қатар аймақ басшысы балалардың қауіпсіздігіне қатысты да нақты тапсырма беріп, жергілікті әкімдіктер мен құқық қорғау органдарына ата-аналармен тығыз жұмыс істеуді жүктеді.
