Semeytany.kz – Бүгін Абай облысы мәслихатының кезектен тыс 29-сессиясы өтті. Жиынға облыс әкімі Берік Уәли, мәслихат төрағасы Шалқар Байбеков, халық қалаулылары, мемлекеттік органдар мен БАҚ өкілдері қатысты.
Сессия барысында 2025-2027 жылдарға арналған облыстық бюджетке өзгерістер енгізу және облыс әкімдігі жанындағы терроризмге қарсы комиссия құрамына түзету мәселелері қаралды. Баяндамалар тыңдалып, нақты шешімдер қабылданды.
Жиынды қорытындылаған аймақ басшысы Берік Уәли бюджетке енгізілген өзгерістер алдымен өңірдегі өзекті проблемаларды шешуге бағытталғанын айтты. Оның ішінде ауыз су тапшылығы ерекше атап өтілді.
– Мемлекет басшысының тапсырмасына сәйкес биыл 28 500 адамды таза ауыз сумен қамтамасыз етуіміз қажет. Су жүйелерінің тозуын азайту үшін кезең-кезеңімен қаржы бөлініп, осы жолы 28 жобаға қаражат бағытталды. Сонымен қатар Семей, Курчатов қалалары мен Аягөз, Жарма аудандарындағы жылу қазандықтары мен жылу желілері жөнделеді. Бұл жұмыстар басталып кетті. Әлеуметтік осал топтарға арналған тұрғын үймен қамту ісі де жалғасуда. Қазіргі таңда 7 мыңнан астам адам кезекте тұр. Биыл осы санаттағы азаматтарға 1000 пәтерге дейін беріледі. Өңірде шешімін күткен түйткілдер көп, оларды сіздермен бірлесе отырып шешеміз, – деді облыс әкімі.
