Әлеуметтік
Semeytany.kz – Абай облысының әкімі Берік Уәли Семей қаласындағы арнайы әлеуметтік қызмет көрсету орталықтарын аралап, олардың бүгінгі жай-күйі мен өзекті мәселелерімен танысты. Аймақ басшысы алдымен №2 арнайы әлеуметтік қызмет көрсету орталығына – Қарттар үйіне барды.
1985 жылы салынған ғимарат 155 адамға арналған. Қазіргі таңда мұнда 152 тұрғынға қызмет көрсетіліп отыр. Олардың 87-сі – егде жастағы азаматтар, ал 65-і – мүгедектігі бар жандар. Мекемеде 5 бөлімше, 11 арнайы кабинет бар, қауіпсіздік үшін 113 бейнебақылау камерасы орнатылған.
Жұмыспен қамту және әлеуметтік бағдарламаларды үйлестіру басқармасының басшысы Айман Нұрлыбектің айтуынша, Қарттар үйі аумағын абаттандыру, бөлмелерге ағымдағы жөндеу жүргізу, жиһаз бен есіктерді жаңарту, желдеткіштер мен терезелерді ауыстыру мәселелері шешімін күтуде.
Қарттармен жүздескен Берік Уәли мекемеде тұрып жатқан азаматтардың әрқайсысының тағдыры бөлек екенін атап өтті.
– Қарттар үйі дегенде ел арасында түсініспеушілік көп. Мұнда тек бала-шағасы тастап кеткендер ғана емес, жалғызбасты, паналар жері жоқ азаматтар да бар. Соңғы уақытта мұнда ер адамдардың саны артқан. Мемлекет міндеттемелерін толық орындап отыр. Әкімдік тарапынан қосымша көмек көрсетіледі, – деді облыс әкімі.
Берік Уәли сондай-ақ №1 арнайы әлеуметтік қызмет көрсету орталығына да барды. Бұл мекеме 18 жастан асқан психоневрологиялық диагнозы бар азаматтарға қызмет көрсетеді. Қазіргі таңда орталықта 399 адам тұрып жатыр, оларға 190 қызметкер қызмет етеді.
Орталықтың екі ғимараты бар: біреуі 1964, екіншісі 1970 жылы салынған. 2023 жылы алғашқы корпусқа ағымдағы жөндеу жасалса, соңғы күрделі жөндеу 2014 жылы жүргізілген.
Мекеме басшысы Айдынбек Нұрдыбаев мекемедегі өзекті мәселелерді тізіп өтті. Атап айтқанда, санитарлық көлік тозған, инватакси қарастырылмаған, бақылау-өткізу бекеті мен кездесу бөлмесі жоқ. Сонымен қатар, ғимараттардың қасбетін жаңарту және тұрғындардың бөлмелерін жөндеу қажет.
Берік Уәли бұл мәселелердің назарда екенін айтты. Оның мәлімдеуінше, орталыққа жөндеу жүргізу үшін облыстық бюджеттен 141 миллион теңге бөлінген. Сондай-ақ прокуратура органдары мемлекет меншігіне қайтарған активтер есебінен мекеме аумағында 100 орындық жаңа ғимарат салынып жатыр.
– Үш жүз адамға арналған орталықта бүгінгі таңда 400 адам тұрып жатыр. Жаңа ғимарат бұл жүктемені жеңілдетеді. Әлеуметтік мекемелер заман талабына сай қызмет көрсетуі тиіс. Екі орталықтың жағдайы жеке бақылауымда болады, – деді облыс әкімі.
