Саясат
Semeytany.kz – Қазақстан Республикасының Президенті Қасым-Жомарт Тоқаев ел халқын Астана күнімен құттықтап, бұл мерекенің Домбыра күнімен тұспа-тұс келуінің ерекше символдық мәні бар екенін атап өтті.
– Қазақтың қасиетті қара домбырасы – Ұлы даланың мыңжылдық мәдени мұрасының айғағы. Ал елорда – еліміздің тұрақты дамуы мен ұлттың жарқын болашаққа ұмтылысының белгісі, – деді Мемлекет басшысы.
Президенттің айтуынша, Астана – Қазақстанның қоғамдық, саяси және іскерлік орталығы. Мұнда маңызды шешімдер қабылданып, елдің келешегіне бағыт беретін істер жүзеге асырылады. Сонымен қатар, білім мен еңбекқорлық, ынтымақ пен келісім құндылықтары терең орныққан.
Қасым-Жомарт Тоқаев елорданың халықаралық аренадағы беделіне де тоқталды.
– Астана – Орталық Еуразияның жауһары, заманауи Қазақстанның келбеті. Халықаралық қауымдастық оны бейбіт бастамалардың, жаһандық диалогтың қаласы ретінде мойындап отыр, – деді ол.
Мемлекет басшысы Астананың елдегі түбегейлі өзгерістер мен ауқымды реформалардың бастауы болғанын атап өтіп, алдағы уақытта да әділетті, таза әрі қуатты Қазақстанды құруда бас қала маңызды рөл атқаратынына сенім білдірді.
– Сүйікті қаламыз өркендей берсін! Баршаңызға зор денсаулық, бақ-береке тілеймін, – деп түйіндеді Президент өз құттықтауын.
