Semeytany.kz – Бүгін Абай облысының әкімі Берік Уәли таңғы сағат 7-ден бастап Семей қаласындағы жылу желілері мен жылу қазандықтарында жүргізіліп жатқан жөндеу жұмыстарының барысын бақылап шықты.
Алдымен аймақ басшысы Жамақаев көшесіндегі 1988 жылдан бері жөндеу көрмеген жылу трассасының жаңғыртылу жұмысын тексерді. Аталған жоба аясында ұзындығы 1,8 шақырым болатын ескі құбырлар толық ауыстырылмақ. Жаңа құбырлардың диаметрі 530 мм-ден 630 мм-ге дейін кеңейтіледі. Бұл жаңарту нәтижесінде қаланың жылу жүйесінің тозу деңгейі 1,4 пайызға төмендейді деп күтілуде.
Жоба екі кезеңнен тұрады. Қазіргі таңда оның 77 пайызы аяқталған. Былтыр 1,05 шақырым жылу желісі төселсе, биылғы жылдың басынан бері тағы 400 метр құбыр жаңартылған. Мердігер компания өкілдері жұмысты мерзімінен бұрын аяқтап, бірден абаттандыру жұмыстарына кірісуге уәде берді.
Облыс әкімі жауапты мамандарға жұмыстың сапасына ерекше мән беруді, ал абаттандыру барысында балалар алаңдарына зиян келтірмеуді тапсырды.
– Бұл жылу желісі 35 жылдан бері жаңартылмаған екен. Қазір жүргізіліп жатқан жұмыс өте маңызды. Жылу маусымына дейін толық аяқтап, тұрғындар игілігіне беруіміз керек, – деді Берік Уәли.
Қазіргі таңда Семейде орталықтандырылған жылу берумен 19 қазандық пен 1 жылу электр орталығы жұмыс істейді. 2025 жылы қалада жылу желілерін жаңғыртудың 6 жобасы жүзеге асырылып жатыр.
