Semeytany.kz – Абай облысының әкімі Берік Уәли өңірдің зиялы қауым өкілдерімен арнайы кездесу өткізіп, алда өтетін ұлы ақын Абайдың 180 жылдық мерейтойына дайындық барысын талқылады. Кеңеске бұған дейін бірнеше Абай мерейтойын ұйымдастыруға атсалысқан тәжірибелі азаматтар мен қазіргі аймақ ақсақалдары қатысты.
Ұлттық мереке – халықпен ақылдаса отырып
Жиынды ашқан облыс әкімі Берік Уәли бұл мерейтойдың тек Абай облысы үшін емес, бүкіл Қазақстан үшін маңызы зор екенін атап өтті.
– Абай – ұлттық идеямыздың, бірлігіміз бен болмысымыздың символы. Мемлекет басшысы Қасым-Жомарт Тоқаев «Абайдың 180 жылдығын лайықты атап өтуіміз керек» деген тапсырма берді. Облыс құрылғаннан бері алғаш рет Абай мерейтойын кең көлемде өткізу мүмкіндігі туып отыр. Бұл – біз үшін тарихи жауапкершілік. Осы ретте сіздердің ақыл-кеңестеріңіз бізге аса қажет, – деді аймақ басшысы.
30-дан астам іс-шара жоспарланған
Кездесуде облыстық мәдениет, тілдерді дамыту және архив ісі басқармасының басшысы Жанжігіт Омархан, Абай ауданының әкімі Мейіржан Смағұлов және Семей қаласы әкімінің орынбасары Қуаныш Әбілдаев мерекелік онкүндіктің бағдарламасымен таныстырды. 1–10 тамыз аралығында Семей қаласы, Абай ауданы және облыстың өзге де өңірлерінде 30-дан астам ауқымды іс-шара өткізу көзделіп отыр.
Зиялы қауым қолдады, ұсыныс айтты
Жоспармен танысқан зиялы қауым өкілдері бағдарлама мазмұнына оң бағасын берді. Абайтанушы ғалым Арап Еспенбетов:
– Бағдарлама толығымен ойластырылған, жүйелі дайындалған. Оның толық көлемде жүзеге асқанын қалаймыз, – деп пікір білдірді.
Облыстық ардагерлер кеңесінің төрағасы Мұрат Әлин де мерейтойдың халық үшін маңыздылығын атап өтіп, ұйымдастыру жұмыстарына табыс тіледі.
Мерейтой – елдік сынақ
Жиынды қорытындылаған облыс әкімі Берік Уәли зиялы қауым тарапынан айтылған барлық ұсыныстар ескерілетінін айтып, мерекелік бағдарлама алдағы аптада арнайы баспасөз мәслихатында ресми түрде жарияланатынын жеткізді.
