Semeytany.kz – Абай Құнанбайұлының 180 жылдық мерейтойы аясында халықаралық, республикалық және өңірлік деңгейде 100-ден астам іс-шара өткізу жоспарланған. Бұл туралы Абай облысы мәдениет, тілдерді дамыту және архив ісі басқармасының басшысы Жанжігіт Омархан мәлімдеді.
Ауқымды бағдарлама 1 тамызда «ABAY ACADEMIYASY» энциклопедиялық порталының ашылуымен басталады. Сол күні Мақаншыдағы Алакөл жағасында Секен Тұрысбеков пен «Ақ жауын» оркестрі өнер көрсетсе, Семей Арбатында иллюстратор Аңсаған Мұстафаның көрмесі мен қолөнер фестивалі өтеді.
2–6 тамыз аралығында халық әртісі Майра Ильясованың Абайға арналған гастрольдік концерті өңірдің бірнеше ауданын қамтиды. Ал 3–6 тамыз күндері Семейде «Абай әлемі» рухани кеші, моноопера, жас ақындар мүшәйрасы мен гала-концерттер ұйымдастырылады.
7–9 тамызда Абай мұрасына арналған шығармашылық кештер, ғылыми конференция, ақындар айтысы мен халықаралық поэзия фестивалі жоспарланған. Бұл күндері «Абай жолы» энциклопедиясы мен бірқатар жаңа кітаптардың тұсауы кесілмек.
10 тамыз – Абай күнінде Жидебайда Құран бағышталып, құрбандық шалынады. Одан кейін еліміздің барлық өңірінде Абай ескерткішіне гүл шоқтарын қою рәсімі өтеді.
