Саясат | Халықаралық байланыс
Semeytany.kz – Бүгін Абай облысының әкімі Берік Уәли Чехия Парламенті депутаттар палатасының вице-спикері Ян Бартошек бастаған делегацияны қабылдады. Кездесу барысында тараптар өзара ынтымақтастықты нығайту жайын талқылап, бірқатар тарихи мәселелерді көтерді.
Аймақ басшысы чехиялық қонақтарға Қазақстан мен Еуропа арасындағы байланысты күшейтудің маңызын атап өтті.
– Мемлекет басшысы Қасым-Жомарт Тоқаев еуропалық елдермен қарым-қатынасты дамытуға ерекше мән береді. Біз чехиялық әріптестермен әр салада ашық диалог орнатуға және инвестициялық ынтымақтастыққа дайынбыз. Бұл сапар алдағы байланысты тереңдетуге мүмкіндік береді деп сенемін, – деді облыс әкімі.
Кездесуде Чехия делегациясы Бірінші дүниежүзілік соғыс кезінде Семейде жерленген чех әскери тұтқындарының тағдырын көтерді. Ян Бартошек олардың есімін есте қалдыру үшін белгі орнатып, тарихи әділеттілікті қалпына келтіру маңызды екенін айтты.
– Біз үшін бұл жерге келудің басты себебі – сол сарбаздарға тағзым ету. Олар өз елінен жырақта қаза тапты. Енді олардың құрметіне белгі орнатып, тарих алдындағы борышымызды өтеуді көздейміз, – деді Чехия вице-спикері.
Өз кезегінде Берік Уәли бұл бастаманың заң аясында қаралатынын және тиісті басқармаларға қолдау көрсетуді тапсырғанын жеткізді.
