Semeytany.kz – Премьер-Министр Олжас Бектеновтің төрағалығымен өткен Үкімет отырысында 2025 жылдың алғашқы жартыжылдығындағы елдің әлеуметтік-экономикалық даму қорытындылары қаралды. Жиында Абай облысының әкімі Берік Уәли өңірдің негізгі көрсеткіштері мен алдағы жоспарлары туралы баяндама жасады.
Әкімнің айтуынша, облыстың қысқа мерзімді экономикалық индикаторы 103,7 пайызға жетіп, межеленген 103,6 пайыздық жоспардан асып түскен. Көлік, құрылыс, байланыс, ішкі сауда, ауыл шаруашылығы және өнеркәсіп салаларында өсім тіркеліп отыр.
Облыста жалпы құны 31,1 млрд теңгені құрайтын 10 инвестициялық жоба жүзеге асырылып жатыр. Соның бірі — құны 1 млрд теңге болатын «Eastern Gold» алтын өндіру фабрикасы іске қосылған. Бұған қоса, Ұлттық цифрлық инвестициялық платформаға 2,7 трлн теңгелік 38 жоба тіркеліп, нәтижесінде 8 мыңнан астам тұрақты жұмыс орны құрылмақ.
Семейдегі «Өндіріс» индустриялық аймағында 4 жоба жүзеге асырылуда. Аймақтың 80 пайызы игерілген, енді оны 600 гектарға дейін кеңейту жоспары бар.
Ауыл шаруашылығы саласында суармалы жерлер көлемі арттырылып жатыр. Қазіргі 113,4 мың гектар алқапты 2028 жылға дейін 214,4 мың гектарға дейін жеткізу көзделген. Бұл үшін 6 жаңа су қоймасы салынып, Ертіс өзенінің мүмкіндігі кеңінен пайдаланылмақ.
Семейде 75 мың адамға арналған жаңа әкімшілік-іскерлік орталық бой көтереді. Мың гектар аумақты қамтитын бұл жобада 40-тан астам әлеуметтік, коммерциялық және әкімшілік нысан қарастырылған.
Алакөл туристік аймағын дамыту мақсатында арнайы бас жоспар әзірленіп жатыр. Онда демалушылар санын 15 мыңнан 90 мыңға дейін ұлғайту және жағалауды 4 шақырымнан 19 шақырымға дейін ұзарту қарастырылған.
Маусым айында өткен «Туған жерге туыңды тік» инвестициялық форумында 15 меморандумға, ал Қытаймен 1,5 млрд АҚШ долларынан асатын 20 келісімге қол қойылған. Бұл халықаралық ынтымақтастықты арттырып, жаңа жобаларға жол ашуы тиіс.
— Облыс әкімдігі экономикалық өсімді сақтауға күш салады. Міндеттерді уақытылы орындаймыз, — деді Берік Уәли Үкімет отырысында.
Премьер-министр Олжас Бектенов Үкімет мүшелеріне Абай облысына қолдау көрсетуді тапсырды.
— Абай облысы — жаңадан құрылған өңір. Республикалық бюджеттен бөлінетін қаржы жеткіліксіз. Сондықтан бұл мәселені ескеріп, қаржыландыру көлемін арттыру керек, — деді Үкімет басшысы.
