Semeytany.kz – Бүгін Семей қаласында Ұлы Отан соғысының ардагері, ғасыр жасаған батыр, «Халық қаһарманы» Әбдіғали Қаймолдинді ақтық сапарға шығарып салу рәсімі өтті. Қаралы жиынға облыс әкімі Берік Уәли, «Шығыс» өңірлік қолбасшылығы, ҰҚК Абай облысы бойынша департаментінің өкілдері, ардагерлер, қоғам қайраткерлері және қала тұрғындары қатысты.
Әбдіғали Қаймолдин 1921 жылы бұрынғы Семей облысы Абыралы ауданының Ұзынбұлақ ауылында дүниеге келген. 1941 жылы майданға аттанып, Сталинград, Украина, Беларусь пен Балтық майдандарында шайқасқан. Төрт рет жараланғанына қарамастан елге аман оралып, түрлі партиялық және мемлекеттік қызметтер атқарған. «Қызыл Жұлдыз» ордені мен көптеген жауынгерлік медальдардың иегері. 2023 жылы Мемлекет басшысы Қасым-Жомарт Тоқаевтың Жарлығымен оған «Халық қаһарманы» атағы мен «Отан» ордені берілді.
Қаралы жиында облыс әкімі Берік Уәли Президент Қасым-Жомарт Тоқаевтың көңіл айту жеделхатын оқып берді.
– Әбдіғали Қаймолдин жастай майдан даласына аттанып, ерен ерлігімен Жеңісті жақындатуға зор үлес қосқан батыр тұлға болды. Бейбіт кезеңде мемлекеттік және қоғамдық істерге белсене араласып, ел игілігі жолында ұзақ жыл қызмет етті. Ғасыр жасап, соңына өнегелі жол қалдырған Әбдіғали Қаймолдиннің жарқын бейнесі мен есімі ұмытылмайды, – делінген жеделхатта.
Аймақ басшысы қаралы жиында сөйлеген сөзінде Әбдіғали Қаймолдиннің ғұмыры ерлік пен отаншылдықтың символы екенін атап өтті.
– Бірнеше ай бұрын ардақты ақсақалымызға арнайы сәлем беріп, емен-жарқын әңгімелескен едік. Ол кісі өткенді еске алып, болашаққа үмітпен қарап, жастарға ақ батасын берген болатын. Ғасыр жасап, ұрпағының қызығын көрген бақытты жан еді. Халқымыз «Қариясы бар ел – қазыналы ел» дейді. Сол сөздің шын мағынасын ағамыздың ғибратты ғұмырынан көре аламыз. Абай жұрты ардақты қариясын ерекше құрмет тұтып, мақтан етті. Барша туған-туыстарына көңіл айтамын. Жатқан жері жарық, топырағы торқа болсын, – деді Берік Уәли.
