Semeytany.kz – Абай облысының әкімі Берік Уәли Жапонияның Хирошима префектурасының губернаторы Хидехико Юзакимен кездесу өткізді. Жиынға Жапонияның Қазақстандағы Төтенше және Өкілетті елшісі Ясумаса Ииджима да қатысты.
Кездесу губернатордың 14-18 шілде аралығындағы Қазақстанға сапары аясында ұйымдастырылды. Жапон делегациясы Курчатов қаласындағы тарихи ядролық нысандарды аралап, Семей ядролық сынақ полигоны мен экспозициялық залды көрді. Сондай-ақ, Семей медицина университетінде де болды.
Тараптар ядролық қарусыздану мен таратпау бағытында бірлесіп жұмыс істеу, Семей полигонының салдарын жоюдағы Қазақстан тәжірибесін тарату, сонымен қатар мәдени-экономикалық байланысты дамыту туралы пікір алмасты.
Облыс әкімі Абай облысы мен Хирошима тағдырлас өңірлер екенін атап өтіп, келесі жылы Семей полигонының жабылуына 35 жыл толуына орай халықаралық конференция өткізуді ұсынды. Сонымен қатар, Қазақстан Премьер-министрімен кездесуде айтылған Жапония Үкіметінің Семейге арналған гранттық бағдарламасына қолдау білдіретінін айтты.
Өз кезегінде губернатор Хидехико Юзаки де ынтымақтастықты жалғастыруға ниетті екенін білдіріп, Хиросиманың ядролық қарусыз әлем құруда тарихи жауапкершілік арқалап отырғанын жеткізді.
Кездесу соңында Берік Уәли мәртебелі меймандарды Абайдың 180 жылдық мерейтойына орай өңірде өтетін халықаралық мәдени шараларға шақырды.
