Semeytany.kz – Абай облысының әкімі Берік Уәли өңірдің өркендеуіне сүбелі үлес қосқан ардагер қайраткер, Шығыс Қазақстан облысы, Бородулиха және Тарбағатай аудандарының Құрметті азаматы Болат Сапорұлының 85 жасқа толуына орай арнайы құттықтау білдірді.
«Парасат» және «Құрмет» ордендерінің иегері Болат Сапорұлы еңбек жолын Ақсуат ауданындағы «Комсомол» колхозында механизатор болып бастаған. Ол ауыл шаруашылығы мен әлеуметтік салаларды дамытуға белсенді атсалысып, 1990 жылдары Бородулиха ауданындағы мектеп пен ауруханаларды сақтап қалуға, Жезкент кен комбинатын кеңейту мен Тасбел орманына резерват мәртебесін беруге зор үлес қосты.
Аймақ басшысы мерейтой иесінің елге сіңірген еңбегі – бүгінгі берекелі тірліктің берік іргетасы екенін атап өтті.
Ауыл шаруашылығы мен әкімшілік басқару саласында ширек ғасырдан астам қажырлы еңбек еткен Болат Сапорұлы аудан басшысы және мәслихат хатшысы ретінде де көптеген игі бастамаларға мұрындық болған.
