Semeytany.kz – Қазақстан Президенті Қасым-Жомарт Тоқаев пен Түркия Президенті Режеп Тайип Ердоған Анкара қаласында Қазақстан – Түркия Жоғары деңгейдегі стратегиялық ынтымақтастық кеңесінің бесінші отырысын өткізді.
Жиында Мемлекет басшысы Түркиямен тарихи және рухани тамыры ортақ екенін атап өтіп, екі ел арасындағы кеңейтілген стратегиялық серіктестік тұрақты дамып келе жатқанын айтты. Екі ел арасында алпыстан астам шарт пен келісім бар екенін жеткізген Тоқаев, жаңа келісімдерге де қол қойылатынын мәлімдеді.
Кеңесте сауда-саттық көлемін арттыру, көлік-логистика, инвестиция, энергетика, ауыл шаруашылығы, цифрлық технология, туризм, білім және қорғаныс салаларындағы ынтымақтастық мәселелері жан-жақты талқыланды. Тоқаев Қазақстанда түрік кәсіпкерлерімен ауыл шаруашылығында 1,3 миллиард долларлық 23 жоба жүзеге асып жатқанын, олардың 18-і іске қосылғанын айтты. Сонымен қатар, түрік инвесторларын жаңа өндірістер мен инфрақұрылымдық жобаларға қатысуға шақырды.
Сапар барысында екі ел арасында 18 үкіметаралық және ведомствоаралық құжатқа қол қойылып, Жоғары деңгейдегі стратегиялық ынтымақтастық кеңесінің бірлескен декларациясы қабылданды.
Түркия Президенті Режеп Тайип Ердоған Қазақстанды бауырлас ел деп атап, Абай Құнанбайұлының 180 жылдығымен құттықтады. Сонымен қатар, екі ел арасындағы сауда айналымын 15 миллиард долларға дейін ұлғайтуға мүдделі екенін жеткізді.
