Semeytany.kz – Абайдың 180 жылдығына арналған онкүндік мерейтойлық шаралар аясында Семей қаласындағы Бейбітшілік аралында этноауыл есігін айқара ашты.
Этноауыл аумағына 10-нан астам киіз үй тігілген. Әр үйдің жанында ұлттық салт-дәстүрлер сахналанып, қазақ халқының рухани байлығы мен тұрмыс-салты көрермен назарына ұсынылуда. Үш алтыбақан жанында ән айтылып, ұлттық тағамдар мен көрмелер, концерттік қойылымдар ұйымдастырылған. Сонымен қатар, этноауылда қазақ халқымен бірге түрлі этностардың да мәдениеті таныстырылады.
Бейбітшілік аралында күн сайын жергілікті өнерпаздардың қатысуымен театрландырылған қойылымдар мен концерттер өтеді. Ән мен күй, ұлттық би мен салт-дәстүр бұл онкүндікті нағыз өнер мерекесіне айналдырмақ.
Бүгін этноауылда қолөнер шеберлерінің «Асыл мұра» атты облыстық фестивалі басталды. Бұл шара ұлттық мұраны жаңғыртып, шығармашылықты қолдауға бағытталған. Үшінші мәрте өткізіліп отырған фестиваль аясында «Аламан құрақ–2025» байқауының жеңімпаздары марапатталады.
Этноауылдың ашылуына облыс әкімі Берік Уәли арнайы қатысып, көрмелерді аралап, өнерпаздармен және қолөнершілермен сұхбаттасты.
1-10 тамыз аралығында этноауыл аумағында қазақ күресі, садақ ату, тоғызқұмалақ, асық ату, гір көтеру секілді ұлттық спорт түрлерінен ашық қалалық чемпионаттар өтетіні де жоспарланып отыр.
