Semeytany.kz – Мемлекет басшысы Қасым-Жомарт Тоқаев Түрікменстанның Аваза қаласында өткен Теңізге шығар жолы жоқ дамушы елдерге арналған БҰҰ-ның үшінші конференциясында сөз сөйледі.
Президент өз сөзінде мұндай маңызды жиынды өткізуге бастамашы болғаны үшін Түрікменстан басшысына және бұл бастаманы қолдағаны үшін БҰҰ Бас хатшысына алғыс білдірді. Сондай-ақ Қазақстанның теңізге шығар жолы жоқ мемлекеттерге арналған алғашқы конференцияны өткізу арқылы бұл үдеріске бастан-аяқ белсенді қатысып келе жатқанын еске салды.
Қасым-Жомарт Тоқаев бүгінде бұл топқа кіретін 32 елде жарты миллиардтан астам адам тұратынын, олардың көбінде қаржы, технология және нарыққа жол табуда айтарлықтай қиындықтар бар екенін атап өтті. Әсіресе көлік қатынасының шектеулері транзит пен сауда шығындарын арттырып, геосаяси сын-қатерлерге осал етеді. Дегенмен Президент теңізге шығар жолы жоқ елдерді әлемдік шешімдерге атсалысатын, тең құқылы серіктес ретінде қарау қажеттігін айтты.
Қазақстан Президенті Авазада қабылданатын жаңа іс-қимыл бағдарламасын толық қолдайтынын айтып, көлік, энергетика және цифрлы инфрақұрылым салаларына жаңа инвестициялық тетіктер қажет екенін жеткізді.
Президент климаттың өзгеру мәселесіне де ерекше тоқталып, өңір елдерін бұл бағытта бірлесіп әрекет етуге, ал келер жылы сәуірде Астанада өтетін БҰҰ-мен бірлескен өңірлік экологиялық саммитке шақырды.
Қазақстан Орта дәліз және «Солтүстік – Оңтүстік» бағыттарындағы көлік желісін дамытып, Еуразиядағы транзиттік хабқа айналуды көздеп отыр. Сонымен қатар, Астана қаласында жаңадан ашылған Alem.AI жасанды интеллект орталығы мен іске қосылған суперкомпьютер арқылы цифрлық серпін берілмек.
– Қазір теңізге шығар жолымыз болмағанымен, келешекте амалын табамыз. География – шектеу емес, ынтымақтастық пен даму – басты басымдық, – деді Мемлекет басшысы.
Президенттің айтуынша, Қазақстан БҰҰ-мен бірге Алматыда Орталық Азия мен Ауғанстанға арналған орнықты даму мақсаттары жөніндегі өңірлік орталық ашу жөнінде келісімге қол қойған. Бұл бастама – Аваза бағдарламасымен үндес.
Сөзінің соңында Қасым-Жомарт Тоқаев теңізге шығар жолы жоқ дамушы елдердің халықаралық серіктестіктен шет қалмауы керектігін баса айтты.
