Semeytany.kz — Қазақ әдебиетінің көрнекті өкілі, жазушы әрі зерттеуші Мұхтар Мағауиннің топырағы туған жеріне жеткізілді.
Қаламгердің ұлы Едіге Мағауин АҚШ-тағы зират басынан алынған топырақты әкесі жерленген ата-баба қорымы – Абай облысының Шұбартау өңіріндегі Көпбейітке әкелді. Мұнда жазушының әкесі Мағауия, үлкен атасы Құрымбай және оны тәрбиелеген Орынбасар әжейдің қабірлері бар.
«Әкеміздің жатқан жерінен топырақ алып келіп, ата-бабасының жанына қойдық. Сондай-ақ туған жердің топырағы мен жусанын әкеміздің Вашингтондағы қабіріне апаруды жоспарлап отырмыз», – деді Едіге Мағауин.
Мұхтар Мағауиннің қолжазбалары мен жеке мұрағаты қазір Вашингтондағы отбасылық үйінде сақтаулы. Жазушы өмірінің соңғы жылдарында дайындаған 27 томдық шығармалар жинағының 26 томы жарық көрген. Қалған еңбектері мен күнделіктері алдағы уақытта басылып шығарылады. Ұлының айтуынша, болашақта әкесінің тұрған үйі Мұхтар Мағауин орталығы мен мұражайына айналмақ.
