Үстіміздегі жылдың қаңтар айының 26-28 аралығында Семей өңірінде кең көлемде «Мал ұрлығы» жедел алдын алу шарасы өткізілді. Аймақ көлемінде орын алып отырған мал ұрлығы қылмыстарының жолын кесіп, ізін ашу және алдын алу шараның негізгі мақсаты болды. Жақында тәртіп сақшылары операцияның қорытындысын шығарды.
{jcomments on}Үш күнге жалғасқан жедел алдын алу шарасына орай арнайы жұмыс тобы құрылып, ішкі істер органдарының барлық бөлімері мен қызметтерінің жеке құрамы жұмылдырылған. Жедел алдын алу шарасы барысында полицейлер ет және мал тасымалымен айналысқан автокөліктерді, ет сататын орындарды тексерген. Нәтижесінде Семей қалалық Ішкі істер басқармасының криминалдық полиция қызметкерлері жергілікті халыққа 5 миллион теңге көлемінде шығын келтіріп, мал ұрлаумен айналысқан қылмыстық топты құрықтады. Абыралы өңірінің 48 және 50 жастағы тұрғындары алдын ала сөз байласып, бір жылдан бері халықтың адал еңбегін қолды қылыпты.
— Бүгінгі күні олардың 20 бас жылқы мен сиыр малын бас пайдалары үшін барымталып кеткені анықталып отыр. Алайда басқа қылмыстарға қатысы бар-жоғы алдағы уақытта анықталмақ. Ұрланған малды барымташылар сыбайластары арқылы көршілес Қарағанды облысының Қарқаралы ауданында саудалағаны анықталып отыр. Қазір Қазақстан Республикасы Қылмыстық Кодексінің мал ұрлығы бабы бойынша қылмыстық іс қозғалып, тергеу амалдары жүргізілуде, — дейді Семей қаласы ІІБ криминалдық полиция бөлімінің аға жедел уәкілі, полиция майоры Асқар Тыканов.
Полицейлердің айтуынша, «Мал ұрлығы» жедел алдын алу шарасы барысында өткен жылдары жасалған қылмыстар да ашылған. Оның үстіне қылмыскерлер көп жағдайда қараусыз жүрген малдарды айдап әкетіп отырыпты. Аталған қылмыс та осындай жолмен жасалған.
— Шаруалар малдарын еш қараусыз өріске бірнеше күн жібере салған. Оның үстіне тұрғындар жоғалған малды бірден іздемейді. Араға бірнеше күн салып барып қана полицейлерге жүгінеді. Сондықтан шаруалар мал бағатын адам жалдап, болмаса әрбір малға GPS трекер орнату арқылы ұрылардан қорғау керек. Аталмыш құрылғыларды Қарағанды мен Оңтүстік Қазақстан облысының тұрғындары қолданысқа енгізген. Оның құнын әрбір шаруа қалтасы көтере алады және нәтижесі жаман емес, — дейді криминалдық полиция өкілі.
Тәртіп сақшылары ұрлықтың алдын алу үшiн тұрғындарға малдарын қараусыз жібермей, күзетті күшейту керектігін және жергілікті тұрғындар арасында сенімді адамға немесе бақташыға тапсыруын сұрайды.
Асан МЫРЗАХАНОВ,
«Семей таңы»
