Semeytany.kz — Президент Қасым-Жомарт Тоқаев 8 қыркүйекте Қазақстан халқына Жолдауында елде Жасанды интеллект және цифрлық даму министрлігін құруды тапсырды. Жаңа ведомство қолданыстағы салалық министрліктің базасында жасақталып, оны вице-премьер деңгейіндегі маман басқаруы керек екенін айтты. Жолдау Парламент палаталарының бірлескен отырысында жарияланып, отандық БАҚ-та тікелей эфирде көрсетілді.
Мемлекет басшысы бұған дейін жасанды интеллектті дамыту жөніндегі кеңесте ұлттық цифрлық экожүйені жедел қалыптастыруды, инфрақұрылымды дайындауды және ЖИ шешімдерін мемлекеттік қызметтерге енгізуді Үкіметке нақты міндеттеген еді. Тоқаев ЖИ-дің елдің инновациялық дамуы мен цифрлық дербестігі үшін стратегиялық маңызын ерекше атап өтті. Жаңа министрлік осы бағыттарды жүйелі түрде үйлестіруге жауапты болады деп күтіледі.
Биыл Мәжілісте «Жасанды интеллект туралы» заң жобасы да қаралды. Депутаттар құжатты Қазақстанда ЖИ-дің қауіпсіз әрі тұрақты экожүйесін құру жолындағы маңызды қадам деп бағалаған. Министрліктің құрылуы заңнамалық бастамаларды іске асыруды және саланы реттеуді бір орталықтан жүргізуге мүмкіндік береді.
