Semeytany.kz — облыс әкімі Берік Уәлидің төрағалығымен өткен кеңейтілген аппараттық кеңесте автомобиль жолдары мен жылыту бекеттерінің қысқа дайындығы талқыланды. Мәселе бойынша облыстық жолаушылар көлігі және автомобиль жолдары басқармасының басшысы Асхат Есеев, «Қазавтожол» ҰК» АҚ Абай облысы филиалының директоры Айбек Әнуарбеков және облыстық жұмылдыру даярлығы және азаматтық қорғау басқармасының басшысы Ақылжан Ақылбеков баяндама жасады.
Абай облысында автомобиль жолдары мен елді мекен көшелерінің жалпы ұзындығы – 10 228 шақырым. Биыл 408 шақырым жолды жөндеу жоспарланған. Қысқа дайындық аясында облыстық маңызы бар 3 нысанда құрылыс аяқталды, қалған 4 нысанда жұмыстар жалғасуда.
Қысқы кезеңде жолдарды күтіп ұстауға 100-ге жуық техника жұмылдырылмақ. Қажет болған жағдайда жеке мердігерлердің қосымша техникасы тартылады. «Қазавтожол» ҰК» АҚ облыстық филиалы республикалық маңызы бар 2 176 шақырым автожолға қызмет көрсетеді: бұл жұмысқа 308 қызметкер, 107 техника және 22 өндірістік база, сондай-ақ 7 жол-пайдалану учаскесі мен 7 жол-пайдалану пункті жұмылдырылған.
Қолайсыз ауа райында жолаушыларға көмек көрсету үшін өңір аумағында 121 жылыту бекеті ұйымдастырылған, олардың жалпы сыйымдылығы 1 120 адамға есептелген.
Жиын қорытындысында облыс әкімі Берік Уәли аудан-қала әкімдеріне жол жөндеу жұмыстарын сапалы аяқтауды, «Қазавтожол» филиалына республикалық жолдардың қысқы дайындығын толық қамтамасыз етуді тапсырды. Сондай-ақ тиісті басқармаларға жергілікті бюджетті нақтылау кезінде жолдарды күтіп ұстауға қажетті қаржыны қарастыру, жылыту бекеттері мен техниканың дайындығын тұрақты бақылауда ұстау жөнінде міндет жүктелді.
