Semeytany.kz — Түркістан қаласында өткен «Орталық Азия – Корея» жергілікті өзін-өзі басқару органдарының II ынтымақтастық форумына Абай облысының делегациясы қатысты.
Форумға Корея Республикасы, Қырғызстан, Қарақалпақстан, сондай-ақ еліміздің Жамбыл, Ақтөбе, Абай облыстары мен Шымкент қаласының өкілдері келді. Кездесуде жергілікті басқару, өңіраралық әріптестік, экономикалық және инвестициялық ынтымақтастық мәселелері талқыланды.
Шара аясында «Түркістан – Жібек жолы бойындағы халықаралық ынтымақтастықтың орталығы», «Тұрақты халықаралық ынтымақтастықтың негізі ретіндегі жергілікті дипломатия», «Өңірлердің инвестициялық және экономикалық әлеуеті», «Аграрлық ынтымақтастық», «Туризм», «Білім беру және кадрлық алмасу, жаңа буын басшыларын дайындау» тақырыптарында сессиялар өтті.
Абай облысы әкімінің бірінші орынбасары Ербол Садыр өңірдің инвестициялық мүмкіндіктерін таныстырды. Сонымен қатар Абай және Түркістан облыстарының, сондай-ақ Корея Республикасының бизнес өкілдері арасында екіжақты келіссөздер ұйымдастырылды.
Кездесу агроөнеркәсіп саласындағы өзара тиімді ынтымақтастықты дамытуға, әріптестікті нығайтуға және инвестициялық жобаларды ілгерілетуге бағытталды.
