Semeytany.kz — Облыс әкімі Берік Уәлидің төрағалығымен өткен кеңейтілген аппараттық кеңесте 2025 жылдың қаңтар–тамыз айларындағы жұмыспен қамтудың кешенді жоспарының орындалуы, өңірдің әлеуметтік-экономикалық көрсеткіштері және бюджеттің игерілуі қаралды. Кеңеске облыстық басқарма басшылары мен өңірлік департамент жетекшілері қатысып, қала және аудан әкімдері бейнебайланыс арқылы қосылды.
Өңірлік жұмыспен қамту картасының іске асырылуы туралы облыстық жұмыспен қамту және әлеуметтік бағдарламаларды үйлестіру басқармасының басшысы Айман Нұрлыбек баяндады. 15 қыркүйектегі жағдай бойынша облыста 18 904 жұмыс орны құрылған: оның 10 713-і тұрақты, 8 191-і уақытша. Инфрақұрылымдық жобалар аясында 1 277 жұмыс орны ашылды, еңбек шарттарының 91,9 пайызы электронды түрде рәсімделген. «Жайлы мектеп», ауылдық аумақтарды дамыту және облыстың даму жоспары шеңберінде де жаңа жұмыс орындары қалыптасты.
Мемлекет басшысының әрбір 10 мың тұрғынға 100 жаңа жұмыс орнын құру жөніндегі тапсырмасын орындау аясында жаңадан іске қосылған кәсіпорындарда 6 мыңнан астам адам жұмысқа тұрды. Субсидияланатын жұмыс орындарына 7 198 азамат орналастырылып, жоспар 108,5 пайызға орындалды. Бөлінген қаржының нысаналы жұмсалуын бақылау үшін өңірде арнайы жұмыс топтары құрылған.
Кеңесте Семей қаласы, сондай-ақ Аягөз, Ақсуат, Көкпекті және Жарма аудандарында жұмыс орындарын құру жоспарының тиісті деңгейде орындалмай отырғаны атап өтілді. Аймақ басшысы әкімдерге жобаларды уақытылы іске асырып, жаңа жұмыс орындарын ашуды, жұмыспен қамтылған азаматтардың зейнетақы жарналарын уақтылы төлеу мен еңбек келісімшарттарын рәсімдеуді қатаң бақылауды тапсырды. «Қаралған мәселе облыс халқының әл-ауқатын және өңірдің әлеуметтік-экономикалық жағдайын жақсартуға бағытталғанын басты назарда ұстау қажет», – деді Берік Уәли.
Экономика және бюджеттік жоспарлау, сондай-ақ Қаржы басқармаларының мәліметінше, 2025 жылдың сегіз айында қысқа мерзімді экономикалық индикатор 102,8 пайызды құрады. Экономикалық өсімді айқындайтын 9 көрсеткіштің алтауы бойынша оң динамика бар. Жыл басынан бері өңірге 275,7 млрд теңге инвестиция тартылған. Тұрғын үйді пайдалануға беру, өңдеу және тау-кен өнеркәсібі, инвестиция тарту бағыттарындағы көрсеткіштерді көтеру жөнінде нақты тапсырмалар берілді.
Қорытындылай келе, облыс әкімі қала-аудан әкімдеріне бюджеттің кіріс жоспарын толық орындауды, бағдарламалар бойынша қаралған қаржыны тиімді игеруді және инвесторлармен жұмысты күшейтуді міндеттеді.
