Semeytany.kz — Семейде облыс әкімі Берік Уәлидің төрағалығымен туризм саласының өзекті мәселелеріне арналған кеңес өтті. Жиынға облыстық басқармалар, кәсіпкерлер палатасы, туристік компаниялар мен демалыс орындарының өкілдері қатысты. Аймақ басшысы туризмнің әлеуметтік-экономикалық маңызын атап өтіп, Мемлекет басшысының Жолдауында берілген тапсырмалар аясында биыл Алакөлге ерекше көңіл бөлінгенін айтты.
Кеңесте облыстық туризм басқармасының басшысы Марат Қабақов өңір туризмін дамыту жоспарын таныстырды. Берік Уәли 2018 жылдан бері жөндеу көрмеген жағалауды ретке келтіру үшін облыстық бюджеттен 658 млн теңге бөлінгенін жеткізді. Кәсіпкерлер палатасының директоры Мақсат Сүйчінов, «S.G. travel» компаниясының басшысы Айман Жакупова, «Ерасыл» демалыс базасының жетекшісі Ерасыл Диқанбаев және өзге де туризм өкілдері жол мен интернет сапасын жақсарту, ақпараттық белгілер орнату, гидтер даярлау, қызмет сапасын арттыру, балалар және экотуризмді дамыту, тарихи және ғылыми нысандарға (Елеке сазы, Абай ауданы, Курчатов) бағытталған турларды ілгерілету жөнінде ұсыныстарын білдірді.
Алакөл жағалауын абаттандыру бойынша арбатты жөндеу, жаңа қоғамдық кеңістік құру, көшелерді жаңарту, пирстер орнату және жағалауды санитарлық тазалау жұмыстары жүргізілді. 2025–2027 жылдарға арналған Жол картасына жалпы құны 8,4 млрд теңгелік жобалар енгізілді: жаңа электр желісі тарту, қатты тұрмыстық қалдықтар полигонын салу, тазарту құрылыстарын, құтқару станциясы мен өрт сөндіру депосын тұрғызу жоспарланған.
Кездесу қорытындысында аймақ басшысы айтылған барлық ұсыныстар ескерілетінін айтып, сала өкілдерімен тұрақты диалог орнатуға дайын екенін мәлімдеді. Оның сөзінше, ортақ мақсат – Абай облысының тартымды орындарын кеңінен таныстырып, өңірді елдегі негізгі туристік бағыттардың біріне айналдыру.
