«Нұр Отан» партиясы Семей қалалық филиалы жанындағы Жемқорлықпен күрес жөніндегі қоғамдық кеңестің кезекті отырысы өтті. Күн тәртібінде үш мәселе қаралды.
{jcomments on}Жиын барысында алдымен «Улыбка» тіс емханасы» ЖШС-нің директоры В.Сайдашеваның өтініші қаралды. В.Сайдашеваның айтуынша, 1998 жылы отбасылық тіс емханасын ашып, «Улыбка» тіс емханасы» деп әділет органдарында тіркеуден өткізген. Кейіннен қаламызда тіс емханасының атауына ұқсас «Улыбка 32» және «Улыбка Плюс» ЖШС-тер тіркеліп, қазіргі таңда жұмыстарын жалғастырып жатқан көрінеді.
— Емделушілеріміз өзге емханалармен бізді жиі шатастырады. Кәсіпкерлік заңнамаға сәйкес, атаулар ұқсас болмауы керек. Сондықтан кейіннен тіркелген ЖШС-тердің атауын өзгерту мәселесін шешіп берсеңіздер,- деп Валия Сайдашева қоғамдық кеңес мүшелеріне өтінішін жеткізді.
В.Сайдашеваның айтуынша, бұл мәселе қозғалғалы, бірнеше жыл болған. Ол ең алдымен сотқа арыз жазып, мәселе арызданушының пайдасына шешіледі. Кейіннен екінші сот ісі жүргізіліп, ШҚО прокуратурасынан «Улыбка» тіс емханасы» мен «Улыбка 32» фирмалық атауларында айырмашылық бар деген жауап беріліп, арыз қанағаттандырылмайтын болып шешілген.
Бұл орайда Семей қалалық әділет басқармасының басшысы Бейсембек Әл-Сейіт фирмалық атауларды тіркеу республика бойынша арнайы бағдарламаның көмегімен жүзеге асырылатынын, қандай да бір қателік болса, тіркелім жасалынбайтындығын жеткізді. Ал Семей қалалық прокурорының көмекшісі Марина Сушкова іс прокуратурада қаралып, арызданушыға жауап берілгенінен хабардар етті. Қоғамдық кеңес мүшелері мәселені заң шеңберінде шешу үшін бір ауыздан В.Сайдашеваға сотқа қайта жүгіну керектігін айтып, кеңес берді. «Нұр Отан» партиясы – халықтың күрмеуі күрделі мәселелерін шешіп, оларға қолдау танытатын партия», — деген қоғамдық кеңестің төрағасы Ғаббас Ибраев істің шешілуі партия назарында болатынын тілге тиек етті.
Күн тәртібінде сонымен қатар жемқорлыққа қарсы қоғамдық кеңестің қабылдаған шешімінің орындалу барысы талқыланды. Тақырып төңірегінде ШҚО денсаулық сақтау басқармасы басшысының Семей аймағы бойынша орынбасары Ғалия Жуасбаева баяндама жасады.
— Жемқорлыққа қарсы күрес саясатын жүзеге асыру үшін денсаулық сақтау басқармасында біршама істер атқарылуда. Жыл сайын жемқорлық іс-әрекетті болдырмау, оның алдын алу үшін арнайы бағдарламалар, іс-шаралар жоспары әзірленеді, арнайы комиссиялар құрылады. Сонымен қатар, денсаулық сақтау басқармасында өтініштер мен шағымдарға арналған сенім жәшігі орналастырылған. 2014 жылы жалпы Семей қаласы бойынша басқармаға 301 жазба түрде өтініш, сұраныс, шағым, ал-ғыс түскен. Олардың дені мүмкіндігі шектеулі жандар, тегін дәрі-дәрмекпен қамтылу, сапалы медициналық көмек көрсетуді және шет елде ем алу мүмкіндігін жасауды өтіну сынды, сонымен қатар өзге мәселелерге қатысты,- деген Ғалия Жуасбаева барлық өтініш-арыздар толығымен қаралып, қанағаттандырылғанын айтты. Сондай-ақ сенім телефоны да орнатылғанын жеткізді. Сыбайлас жемқорлықты болдырмау үшін электронды байқаулар, дәрі-дәрмек пен медициналық құрылғылар сатып алу мемлекеттік заңнамалар аясында жүзеге асырылатындығынан ақпараттандырды.
Одан кейін білім саласындағы жемқорлықтың алдын алу мәселелері талқыланды. Өз кезегінде сөз алған білім бөлімі басшысының орынбасары Е.Естаев салада жүргізіліп жатқан жемқорлыққа қарсы күрес әрекеттері жайында баяндады.
— Білім бөлімінің мұрындық болуымен жуырда білім ордаларының директорлары бас қосып, ҚР 2015-2025 жылдарға арналған сыбайлас жемқорлыққа қарсы стратегиясын жүзеге асыру мәселесі талқыланды. Арнайы бағдарлама әзірлеп, жемқорлықты тудыратын әрекеттерді талдау, алдын алу шараларын қолға алу көзделді. 2014 жылы білім бөліміне 52 арыз-шағым, өтініш, алғыс түсіп, барлығы қарастырылды,- дей келе, білім білімі салада сыбайлас жемқорлықты болдырмау мәселесін назардан тыс қалдырмайтынын атап өтті.
Қоғамдық тыңдаудың кезекті отырысында мектеп оқушыларын ыстық тамақпен қамту, білім ошағына жөндеу жұмыстарын жүргізу сынды өзге де мәселелер қаралатын болады.
Әйгерім СӘРСЕНҒАЛИ,
«Семей таңы»
