Наурыз – ерте заманнан бері қазақ жұртшылығы асыға күтетін жыл бастау мейрамы. Ұлыс күні қазақ елі үшін әрқашан қасиетті, киелі саналған. Осы күні халық таза, жаңа киімдерін киіп, ер адамдары бір — бірімен қос қолдасып, төс қағыстырса, әйелдер құшақтасып, бір—біріне игі тілектерін айтысқан екен. Ауыл ақсақалдары болса араларына жік түскен бауырлас ел, руларды, ағайын, дос — жарандарды бір дастарқаннан дәм таттырып, табыстырған, жалғыз— жарым жетімдерді үйлендіріп, жеке отау еткен деседі. Бұл мерекенің біздің ауыл үшін де маңызы зор.
{jcomments on}Бесқарағай ауданына қарасты шағын ғана Башкуль ауылында Ұлыстың ұлы күні- Наурыз мерекесін бүкіл ауыл болып тойлау — жыл сайынғы дәстүрге айналған үрдіс. Жылда ауыл тұрғындарының арасында көктемнің осынау шуақты мерекесін ерекше атап өтуді жөн санап, бір жылы бойжеткендеріміздің арасында «Наурыз аруы» атты байқау ұйымдастырылса, келесі жылы ардақты ақ жаулықты аналарымыздың қатысуымен «Әжелер сайысы» өткізілді. Бұдан өзге де көшелер сайысы, яғни ауылымыздың 4 көшесі мерекеге айрықша дайындалып, қазан-ошақтарын құрып, самауырдың буын бұрқыратып, қазақ халқының ұлттық тағамдарын дайындап, ән салып, би билеп Наурыз мерекесінің мерейін асыр- ған болатын, сонымен қатар мектепте де «Тұсау кесу», «Қыз ұзату», «Бесікке салу», «Сүндет той», «Шілдехана» сынды қазақтың салт-дәстүрлерін айшықтайтын көріністер көрсетіледі.
Әр жолы Наурыз мерекесін қарсы алуға арналған іс-шаралар жоғары деңгейде ұйымдастырылады. Башкуль ауылында тұратын әртүрлі ұлт өкілдері өте ұйымшылдықпен қазақ халқының салт-дәстүрлерін көрсетіп қана қоймай, мәде-ниетін дәріптейді, Наурыз мерекесінде ағайын-туыс бірін — бірі құттықтап, сыйлы қонақтарына ақ дастарқаннан ас ұсынып, наурыз көжеден дәм татқызып, мерекенің тартымды өтуіне жағдай жасайды. Күн райына байланысты киіз үй тігіліп, алтыбақан құрылып, ұлттық киіммен келген қыз-қырқын мерекенің ажарын ашатындығы сөзсіз. Башкуль ауылында Наурыз мерекесін өткізуге шаруа қожалықтарының басшылары мен кәсіпкерлеріміз демеушілік көрсетіп, қолдау танытып тұратындығын да атап өтпеске болмас.
Осы күні «Теңге алу», «Аударыспақ», «Қазақша күрес», «Арқан тарту», «Бәйге» сынды ұлттық ойындарға қатысып, ептілігімен танылып, ауылдастарының ықыласына бөленіп жүрген Жасталап Жұмажановты, үздік бапкер ретінде Думан Жұманалинді, ұлттық қолөнерді жетік меңгеріп қана қоймай, кейінгі ұрпаққа тоқыма тоқуды үйретіп жүрген Әсия Хасанова апайды, ұлттық тағамдарды баппен, дәмді етіп әзірлейтін Фарида Құрманова сынды әпкелерімізді айрықша атағым келеді.
Бүгінгі таңда Башкуль ауылында Наурыз мерекесіне дайындық жұмыстары қызу жүргізілуде. Арнайы бағдарлама дайындалып, мерекелік іс-шараны атап өтуге ауыл тұрғындары тегіс жұмылдырылуда. Жер — дүниені жаңартып, көктемді ерте келетін Ұлыстың ұлы күні — Наурыз мерекесі — құтты болсын! Сіздерге шынайы көңілмен бақыт-береке, ашық аспан, игілік және табыс тілейміз.
Люция ХАМИТОВА,
«Башкуль» татар мәдени
орталығының мүшесі.
