Semeytany.kz — Бүгін Абай атындағы облыстық әмбебап кітапханада облыс әкімі Берік Уәли Семей қаласының тұрғындарымен кездесті. Жиында алдымен қала әкімі Әділет Қожанбаев 2024-2025 жылдардағы негізгі көрсеткіштерді баяндап, қалада атқарылып жатқан жұмыстарға тоқталды. Ал аймақ басшысы өңір мен облыс орталығының әлеуметтік-экономикалық дамуы, шешімін күткен мәселелер және алдағы жоспарлар туралы кең көлемде мәлімет берді.
Әкімнің айтуынша, 11 айдың қорытындысында облыс экономикасына 495,2 млрд теңге инвестиция тартылып, оның 144,8 млрд теңгесі Семей қаласының үлесіне тиесілі. Сондай-ақ жыл басынан бері өңірде іске асырылып жатқан жобалар саны 29-дан 98-ге дейін артқан. Тартылған инвестиция көлемі 2,2 трлн теңгеден 3,8 трлн теңгеге жеткен.
Кездесуде «Туған жерге туыңды тік» инвестициялық форумы аясындағы нәтижелер де айтылды. Өңірден шыққан кәсіпкерлер мен меценаттардың қатысуымен жалпы құны 336 млрд теңгені құрайтын 15 келісім жасалған. Соның ішінде құны 31,7 млрд теңге болатын екі жоба іске асырыла бастаған. Атап айтқанда, 5,7 млрд теңгелік «Pana Complex Semey» қонақ үй кешені жақын уақытта пайдалануға беріліп, 105 жаңа жұмыс орнын ашпақ. Ал «Aqniet Group» компаниясы 26 млрд теңгелік «Semey Mall» сауда-ойын-сауық орталығының құрылысын жүргізіп жатыр. Жоба іске қосылған соң 100 адам жұмыспен қамтылады.
Қаладағы өндірістік әлеуетті күшейту бағытында да жоспарлар нақтыланған. Аумағы 96 гектар болатын «Өндіріс» индустриялық аймағында 3 жаңа жобаға жер беріліп, толық игерілген. Енді бұл индустриялық аймақ 186 гектарға дейін кеңейіп, шағын өнеркәсіп паркін құру жұмыстары қолға алынған. Алдағы уақытта Семей қаласының өнеркәсіптік аймағына 500 гектар жер бөлу көзделіп отыр. Бұған қоса, қалада 23,8 млрд теңгеге 6 инвестициялық жобаны жүзеге асыру жоспарланған.
Тұрғындарды толғандырған негізгі бағыттардың бірі – инфрақұрылым. Биыл Семейді жылумен үздіксіз қамтамасыз ету үшін 12 жылу көзі жаңғыртылып, 13,6 шақырым жылу желілері ауыстырылған. Мемлекет басшысының халықты 100 пайыз таза ауыз сумен қамтамасыз ету тапсырмасы аясында облыста 33 жоба іске асырылып жатыр. Оның ішінде Семей қаласының Нахаловка, Бобровка, Березовский кенттері де бар.
Жол және абаттандыру мәселесіне қатысты мәлімет те берілді. Облыс орталығында 52 көшеде орташа жөндеу жүргізіліп, оның 36-сы бұрын асфальтталмаған көшелер екені айтылды. Келесі жылы мұндай көшелердің санын арттыру жоспарланып отыр. Сонымен қатар 40 аулаға асфальт төселіп, 35 аула абаттандырылған. Қарағайлы шағын ауданында жаңа саябақ ашылған. Биыл аспалы көпірдің жолына жөндеу жүргізіліп, ал нысанды күрделі жөндеуден өткізу үшін жобалық-сметалық құжаттама әзірленуде. Сондай-ақ Семейде төрт жолақты жаңа көпір салу жобасы іске асырылып жатыр.
Әлеуметтік нысандарға тоқталған әкім Мемлекет басшысының қолдауымен «Абайға құрмет» акциясы аясында еліміздің әр өңірі облысымызға бір нысаннан салатынын жеткізді. Бұл ғимараттардың басым бөлігі жаңа тұрғын ауданында бой көтереді. «Келешек мектептері» ұлттық жобасы аясында жыл басынан бері Семей қаласында 2 жаңа мектеп пайдалануға берілген. Шығыс кентінде 300 орындық мектептің құрылысы жүріп жатыр. Облыс орталығында 500 орындық көпфункционалды Оқушылар сарайы мен 18 жастан асқан адамдарға арналған 100 орындық психоневрологиялық медициналық-әлеуметтік мекеме ғимаратының құрылысы аяқталған.
Спорт инфрақұрылымын дамыту бағыты да назардан тыс қалған жоқ. «Туған жерге туыңды тік» форумы аясында «KazMinerals» ЖШС Семейдегі жаңа ықшам ауданында 25 мың орындық стадион құрылысын бастаған. Қазіргі уақытта Ұшақтар кентінде Дене шынықтыру және сауықтыру кешені салынып жатыр.
Төрт сағатқа созылған кездесу барысында облыс әкімі тұрғындардың ұсыныс-пікірлерін тыңдап, қойылған сұрақтарға жауап берді. Аймақ басшысы Семейдің тарихи-рухани салмағын атап өтіп, Абай облысының құрылуы өңір үшін жаңа мүмкіндіктер ашқанын айтты. Президент пен Үкіметтің қолдауы нәтижесінде әлеуметтік-экономикалық даму ілгері жылжи бастағанын жеткізіп, алдағы мақсат халықтың тұрмыс сапасын жақсартып, өмір сүруге қолайлы орта қалыптастыру екенін атап өтті.
