Семейліктердің мақтанышына айналған ірі кәсіпорындардың өткен ғасырдың 30 — 80 жылдардағы тарихы, маңдай терін төгіп, ұрпағының болашағы жолында аянбай еңбек еткен тұлғалардың өнегелі істерін бүгінгі жастар біле бермейтіні анық. Осы олқылықтың орнын толтыра түсу, жастарға еңбектің қадірі мен болашақ үшін маңызын көрсету мақсатында Семейдің облыстық тарихи-өлкетану музейінде «Тарихымыздың беттері» атты көрме ашылды.
{jcomments on}Қазақ хандығының 550 жылдығына орай ұйымдастырылған аталмыш көрмеде музей қорының ұзақ жылдар бойына жинаған жәдігерлері — кәсіпорындардың шығарған бұйымдары, марапат құжаттары, фотосуреттер орын алған.
Музей директоры Бекен Теміров өз сөзінде осы шараның ерекшелігіне тоқтап, өткенсіз тұрақты болашақтың болмайтынын, көрмеде бірнеше ұрпақ бастан кешірген кезең, болашақтың жар-қын күні жолындағы қажырлы еңбектің көрсетілгенін атап өтті.
Көрмеде ет — консерві комбинаты, Түрксіб темір жолының құрылысы мен магистралінің бөлімдері, тері — мех бірлестігі, цемент зауыты мен құрылыс индустрия кәсіпорындары, жүн өңдеу мен тоқыма фабрикалары, кеме жөндеу және кабель зауыттарының тарихы баяндалады. Олармен бірге тігін және аяқ киім фабрикалары сияқты қуаты шағын, бірақ қала үшін маңызы зор мекемелер де бар.
Тарихқа көз жүгіртсек, соғыс жылдары бірнеше кәсіпорындар қаламызға қоныс аударған — ды. Соғыстан кейін ел еңсесі көтерілген тұста жаңа кәсіпорындар салына бастады. Осы ретте қала экономикасын дамытуға үлкен үлес қосқан арматура зауыты, тоқыма — шұға бірлестігі, «Казахкабель», силикат зауыттары, сыртқы трикотаж фабрикасы, көлік жөндеу зауыты, ұн — жем комбинаттарын айтуға болады.
Көрменің екінші бөлімі ауыл шаруашылығының даму кезеңін көрсететін деректер, шаруа қожалықтарын ұжымдастыру мен ірі колхоз — совхоз өндірістерінің құрылу тарихына арналды. Абай, Бородулиха, Жарма, Үржар, Шұбартау және өзге де аудандардың Социалистік Еңбек Ерлері жеке бөлімде көрсетілді.
Көрменің тұсауын кесу құрметі қалалық ардагерлер кеңесінің төрағасы Амантай Доғалақов және Семей қаласының Құрметті азаматы, Калинин аудандық партия комитетінің бірінші хатшысы болған Қажығұл Тоқабаев ақсақалға берілді.
Көрмеге сонымен бірге музейдің кітап қорындағы өңіріміздің ауыл шаруашылығы мен экономикасына қатысты кітаптар қойылды. Оның ішінде қаламызда қарқынды жұмыс істеген кәсіпорындар, 80 жылдық тарихы бар Семей ет — консерві комбинаты, «Большевичка», сыртқы трикотаж, галантерея, аяқ — киім фабрикаларының өнімдері, сонымен бірге музей қорында ұзақ жылдар сақталған 1920 — 1980 жылдар аралығындағы тулар болды.
Зал төрінен орын алған бұл тулардың әрқайсысы еліміздің басынан кешірген талай тарихи оқиғалардан сыр шертеді. Ішіндегі ең көнесі, ғасырға жуық тарихы бар «Айрықша міндеттегі бөлім» (Часть особого назачения) партизан отрядтарының туы. Онда мынадай жазулар бар «Отдельному стрелковому батальону Семгубчека от Семипалатинского губкома Р.К.П. и Губернского исполкома Советов. «Через диктатуру пролетариата к торжеству коммунизма». Бұл тулардың көбі кәсіпорындар, колхоздар мен совхоздарда өнім сапасын арттыру мақсатында жүргізілген социалистік жарыстардың жеңімпаздарына, үздік бригадаларға берілген.
2015 жылдың 18 наурызында ашылған «Тарихымыздың беттері» көрмесі мамыр айына дейін жалғасады. Семей өңірінің өткенінен сыр шертетін тағылымы мол көрмені көреміз деуші тұрғындар мен қала қонақтарын асыға күтеміз.
Шынар САДЫҚОВА,
Семейдің облыстық тарихи-өлкетану музейінің ғылыми хатшысы.
