Кезінде ұлы ойшыл Ибн Сина: «Ауру көбінесе ішкен астан пайда болады, соның ішінде әсіресе ауыз судан болады»,- деген екен. Қазақстан халқына арнаған жыл сайынғы Жолдауларында Елбасы халықтың денсаулығын жақсарту мәселелеріне байланысты сөз қозғағанда таза судың халыққа қолжетімді болуы мәселесін үнемі айтып келеді. Бұл ретте халықты таза ауыз сумен қаматамасыз етуде «Ақбұлақ» бағдарламасын атауға болады.
{jcomments on}Елді орталықтандырылған таза сумен қамтамасыз етуге арналған бағдарламалардың халық денсаулығын жақсартуға тікелей қатысы бар. «Қазақстандықтардың өмір жасын ұзарту — ол адам денсаулығын сақтау. Адам денсаулығын сақтау үшін ең бастысы – ауыз су»,- деп Елбасымыз «Ақбұлақ» бағдармасының маңызын түбегейлі тұжырымдап берді.
Мемлекет басшысы ерекше назар аударып отырған міндеттердің бірі жұртты таза сумен қамтамасыз ету мәселесі Тарбағатай ауданында да мықтап қолға алынып, нақты жүзеге асырылып келеді. Бұл жұмыс Тарбағатай ауданының әкімі Ділдабек Оразбаевтың тікелей бақылауындағы шаруа десек, қателеспейміз. Мемлекеттік «Ақбұлақ» бағдарламасының жергілікті жерде атқарылуы, жұмыстың сапасы, орындалу барысы жайлы көпшілік жиындарда жиі сөз болады. Аудан әкімі әр ауылға барған сайын осы «Ақбұлақ» бағдарламасының орындалу жағдайына көңіл бөледі. Таза судың, ең бастысы, адам денсаулығының кепілі екенін қарапайым ауыл халқына ерінбей түсіндіреді.
Ауылдардағы әр көше бойымен құбыр арқылы келіп, әр үйдің іргесіне, «Қызыл сызыққа» жеткізіліп тұрған таза су желісін үйге кіргізіп алу мәселесіне келгенде, «оны қайтеміз, ақша шығарып» деп, маңызды іске немқұрайлы қарайтындармен ауыл әкімдері әңгімелесіп, түсінік жұмыстарын жүргізеді. Бұл мәселеде халықты ұтымды іске ұйымдастыра білген ауыл әкімдерінің абыройы асып тұр. Сондай басшылардың бірі — Ойшілік ауылдық округінің әкімі Серік Ығиев. Аудан басшысы Ділдабек Тәжібайұлы Ойшілік ауылы тұрғындарының (240 үй) толықтай таза сумен қамтылып, тіршілік нәрі — мөлдір судың игілігін көріп, суық су мен ыстық суды қатар пайдаланып отырғанын үлгі ретінде айтып отырады. Аудандағы басқа ауыл әкімдерін Серік сияқты жұмыс істеуге, халықты ұйымдастыру тәсілдерін Серіктен үйренуге шақырды.
Таяуда біз елдің шетінде, желдің өтінде, шекараның түбінде отырған Ойшілік ауылына барып, «Ақбұлақ» бағдарламасы бойынша атқарылған жұмыстармен таныстық. «ПМК құрылыс» мекемесі жұмысшыларымен ауыл халқы, ондағы іскер азаматтардан құрылған шағын бригадалар тығыз ынтымақтастықта жұмыс жүргізіпті. Ауыл азаматтары М.Әрінов, Д.Гайсин, Е.Болысов, Е.Назарбеков, Т.Қойлыбаев, Ә.Әмірханов, Б.Кәлімжанов, М.Құнафин, Ж.Дүйсенбеков, Б.Құрманғалиев, Д.Жадыранов, Ж.Ахметов және басқалар ерекше белсенділік танытқан екен. Бұл іске ауыл әкімінен бастап, барлық әкімшілік қызметкерлері жұмыла кіріскен екен.
— Әр көшеге бір — бір қызметкерімді бөліп қойдым. «Ақбұлақты» іске асыруды ертелі-кеш мұқият қадағаладық. «Бір жағадан бас, бір жеңнен қол шығарып» дегендей, ұйымшылдықтың арқасында ауылдағы әрбір үйдің таза суды еркін пайдалануына қол жеткіздік, — дейді ауыл әкімі Серік Ығиев.
Ауылда алғашқылардың бірі болып үйіне су кіргізіп алған – еңбек ардагері Мәрияш Қоңырова екен.
— Ауылымызға ауыз судың келуі — Елбасымыздың халыққа жасаған қамқорлығының нәтижесі. Ескі үйдің орнына жаңадан үй салып алдық. Суық су, ыстық су — бәрі де жасалған, қаладағы үйлерден бір кем емес. Ерінбей еңбек еткен адамға ауылда да мәдениетті өмір сүруге толық жағдай бар. Осындай бақытты тұрмысқа жеткізген ел басшылығына, Мемлекет басшысына алғысымыз шексіз,- дейді ардақты ана Мәрияш Қоңырова.
Хамза СӘТИЕВ,
«Семей таңы»
