Көкпекті ауданы дамудың даңғыл жолын индустриялық – инновациялық бағыт бойынша жалғастыруда. Ауданның ауыл шаруашылығы саласына жаңа әрі заманауи тұрғыдан серпін беру үшін аудан әкімдігі үнемі жергілікті инвесторлардың игіліктерін тиімді пайдалануда. Көкпекті ауданында осы ретте болашағы жарқын бірқатар жобалар іске асырылып, билік пен бизнес арасындағы әріптестік нығаю үстінде. Ауданда аграрлық сектордың индустриялық-инновациялық дамуы 3 инвестициялық жоба бойынша жүргізіліп келеді. Мұндағы басым бағыт — мал шаруашылығы. Көкпекті ауданы осы саланы дамыту арқылы ауыл шаруашылығын жаңа бір белеске көтеруді мақсат етіп қойған. Қолға алынған 3 инвестициялық жобаның бірі «Елім-ай Көкпекті» агроөнеркәсіп кешенін құру жобасы болатын. 2011 жылдың көктемінде құрылып, міне, төрт жылда «Елім-ай Көкпекті» кешенінің ертеңге деген нық сеніммен жұмыс жасап келе жатқанын аңғаруға болады. Сол 2011 жылы кешен жобасы мен жай- жапсары үйлестіру кеңесінде қаралып, мақұлданған болатын. Осы ретте агроөнеркәсіп кешенін Көкпекті ауданындағы ет бағытындағы қолға алынған ірі жобалардың бірегейі десе де болады.
{jcomments on}Инвесторлардың ұсынысы аудандық әкімдіктен қолдау тауып, жоба бастамашыларының бизнес жоспарына сәйкес, бір мезгілде жемшөп базасын дайындау, асыл тұқымды малдарды жеткізіп, техникалар сатып алумен қоса, репродуктор мен бордақылау алаңының құрылысын бастау жоспарланған болатын. Бастапқы шаруалар оң шешіліп, кешеннің жыл санап қуаты артып келеді. Жобаның жалпы құнының 85 пайызы «ҚазАгроҚаржы» акционерлік қоғамы тарапынан бөлінсе, қалған 15 пайызы — ин-весторлардың өз қалтасынан. Жобаның ауқымдылығына байланысты несиені бөлер алдында инвестициялық компанияның барлық мүмкіндіктеріне, әлеуетіне аудиторлық тексерулер жүргізіліп барып, қаржы жобаның жұмысын жалғастыруға берілген. 2016 жылға дейін инвестициялық жобаны жүзеге асырудың 4 бағытын белгіледі. Асыл тұқымды репродуктор құру, жемшөп өндіруді дамыту, бордақылау алаңын құру, мал сою цехын салу сынды кешенді жұмыстар осы төрт бағыттың негізі болып табылды.
Бұл күнде 2016-шы жылға дейін жүзеге асатын төрт бағыттың есебі түгел. Мыңға тарта мүйізді ірі қараның 180 басы герефорд тұқымы болса, 726 басы — абердин ангус асыл тұқымды ірі қарасы. Әкелінген ірі қара тұқымдары біздің табиғатқа жақсы бейімделген. Мұның барлығы бабын тауып бағудың, жайын тауып күтудің нәтижесі. Жемшөпті талғау жағынан да қиыншылық жоқ. Қосымша дәрумендік қоспалар жем және шөп арқылы беріледі.
Жуырда Көкпекті ауданына жұмыс сапарымен барған Даниал Ахметовке агроөнеркәсіп кешенінің басшысы Болат Бекбердинов 2024 жылға дейін мал басын 14 мыңға жеткізуді көздеп отырғанынан хабардар етті. Ауданға жасаған сапарында Даниал Кенжетайұлы: «Елім-ай Көкпекті» АӨК-ін аралай отырып, әлемдік стандарттарға сай кешен құрылғанына көзім жетті»,- деп атап өткен болатын.
Міне, ертеңге деген сеніммен ел игі-лігіне қызмет жасап жатқан «Елім-ай Көкпекті» кешенінің бүгінгі тынысы осындай. Әлбетте, жеткен жетістік ұлттар тұтастығы мен өңір экономикасының өркендеуімен тығыз байланыста екені анық.
Ерзат ЖАНАТҰЛЫ,
«Семей таңы»
