Өндіріс нысандарының көптеп ашылып, өнімдерінің нарықта кең сұранысқа ие болуы сол өңірдің экономикасының қарқын алуына да оң септігін тигізетіні белгілі. Мұндай игілікті шара, түптеп келгенде, тек ауданның әл-ауқатын жақсартып қана қоймайды, аймақтың, қала берді байтақ республикамыздың қуатын арттыруда елеулі үлес қосады.
{jcomments on}Бүгінде Зайсан ауданында құрылыс өнеркәсібі түрлерін дамытуға да кеңінен ден қойылып келеді. Мәселен, есімі облысқа ғана емес, елімізге де танымал болып үлгерген зайсандық белді кәсіпкер Қ.Абжанов басқаратын «СМУ-Шығыс» ЖШС құрылыс материалдарын шығаруда Шығыс аймағы бойынша жетекші орыннан табылады. Атап айтсақ, темір-бетон өнімдерін шығаратын зауытты кеңейтіп, еңбек өнімділігін еселеу мақсатында соңғы екі жылдың ішінде бірқатар жоспарлы жұмыстар атқарылыпты. Межелі жұмыстар жетістіктерге толы. Қолға алынған шаралар нәтижесінде зауыт жоспары Шығыс Қазақстан облысының үдемелі индустрияландыру картасы бойынша инвестициялық жобаға енгізілді. Жобаның екі кезеңі бойынша өндіріс орны «Өнімділік — 2020» мемлекеттік бағдарламасына қатысушы болып танылды.
Бүгінде аумағы ат шаптырым зауыттың ішіндегі еңбек барысы мейлінше қарқынды. Мұндағы әр маманның басты міндеті – өз жауапкершілігіндегі қызметті тиянақты атқарып, жоғары сапалы өнім өндіру. Ал, негізінен, ішкі нарыққа жол тартатын өнімдердің барлығы дерлік — құрылыс саласына қажетті дүниелер. Жалпы, бұл өндіріс ошағында ел игілігіне арналып шығарылатын әрбір өнімге сұраныс жоғары. Аймақтардағы тұрғын үй құрылысының дамуы зауыт жұмысына да тың серпін берген. Қазіргі күні облысымыздың бірнеше аудандарын сапалы құрылыс жабдықтарымен қамтамасыз етіп келе жатқан зауыт ұжымы өткен жылды жемісті аяқтап, жоғары көрсеткіштермен қорытындылады. Оның бірден-бір себебі жаңашылдыққа ұмтылыс, инновация игіліктеріне арқа сүйеу екен.
Италиялық «Корсетти» фирмасының темір-бетон трубасын шығаратын жаңа технологияны орнату арқылы өндіріс ошағының қарқындылығын арттыруды көздеген зауыт жылына 6000 м 3 темір-бетон бұйымдарын шығаратын мүмкіндікке ие. Бұрынғы технология бойынша бетон көлемін қалыпқа келтіру 90 метрлік жолда жасалатын болса, жаңа жоба бойынша LCM 1520/ S автоматтық виброқысым құрылғысында жасалады.
Ұжым еңбеккерлері қатарында жастар көп. Тәжірибелері толысқан кәсіби мамандар да жетерлік. Әсіресе құрылыс жұмыстарына аса қажетті мұндай материалды шығару ісіне краншы қыз-келіншектердің де қосып жүрген үлесі салмақты. Арнайы технологиялар арқылы әзірленген дайын өнімдерді кранмен көтеріп, тиісті орындарына жеткізуде Рәшида Нұғыманова бастаған нәзік жандылар өз міндеттерін жауапкершілікпен атқарып, өндіріс ошағындағы тіршіліктің қарқынына елеулі үлес қосып келеді. Зауытта ол тәрізді еңбек адамдарына ерекше назар аударылады. Сондай-ақ Ләззат Тоқбаева, Арай Жұлдызбаева, Зәмзәгүл Елеукенова, Қарлығаш Жанарбек, Аяужан Игіметова, Жанаргүл Сләмғалиева сынды өз ісінің шеберлері — ұжымның мақтанышы. Краншы бұрымдылар, нағыз еңбекқор жандар, отандық өнім өндіруде аянбайтындықтарын айтады.
Берекелі ұжым осылайша аймақтағы құрылыс индустриясының қарқынды дамуына сүбелі үлес қосып, техника-экономикалық жағынан тиімділігі жоғары бұйымдар өндіруде жаңа жетістіктерді бағындыруда.
А. НҰРТАС, Зайсан ауданы.
