Semeytany.kz – Абай облысының әкімі Берік Уәлидің төрағалығымен өткен кеңейтілген аппараттық кеңесте өңірде жасанды интеллектіні дамыту барысы қаралды.
Күн тәртібіндегі мәселе бойынша цифрлық технологиялар басқармасының басшысы Абзал Серікұлы баяндама жасады. Оның айтуынша, қазір облыста цифрландыру бағыты бойынша бірнеше жоба жүзеге асып жатыр. Семейде «Ақылды қала» жобасы аясында жастарды бағдарламалау, робототехника және цифрлық кәсіпкерлікке баулу жұмыстары жүргізілуде. Денсаулық сақтау саласында «Цифрлық емхана» мен электрондық кезек жүйесі енгізілсе, білім беру ұйымдарында «Цифрлық мектеп», электрондық журнал, күнделік және «Мектеп асханасы» жобалары қолданылып келеді. Ауыл шаруашылығы саласында да жер және мал шаруашылығын басқарудың цифрлық платформалары іске қосылып, фермерлерге онлайн қызметтер ұсынылуда.
Өңірде ІТ саласына қызығушылық танытатын жастар саны да көбейіп келеді. Хакатондар мен стартап байқауларына қатысушылар қатары артқан. 2025 жылдан бастап жасанды интеллектке қатысты оқыту бағдарламалары аудан орталықтарын да қамти бастаған. Alikhan Bokeikhan University базасында ASSYLTAS қоғамдық қорының бастамасымен «Assyl AI» жобасы іске қосылып, жастарды жасанды интеллект құралдарымен жұмыс істеуге үйрету қолға алынған. Сонымен қатар RO-ALEMI робототехника орталығының тәрбиеленушілері халықаралық жарыстарда жоғары нәтиже көрсетіп жүр. Семей қаласы әкімдігі инновациялық бастамаларды қолдау үшін GovTech байқауын өткізіп, 30 млн теңге көлемінде грант бөлген.
Биылғы жоспарға сәйкес облыстағы IT-резиденттер санын 100-ден асырып, 50-ден астам жаңа IT жұмыс орнын ашу көзделіп отыр. Бұдан бөлек, «Ақылды қала» бағдарламасы аясында бағдарламалау мектептерін дамыту, «109» қызметін жетілдіру, ақылды жарықтандыру, контейнерлік алаңдарды цифрландыру, бейнебақылау мен жол қауіпсіздігі жүйелерін жаңарту жобалары қолға алынған. Абай облысының 2026-2030 жылдарға арналған «Ақылды қалаларды дамыту» стратегиясы бекітілген. Жол картасы Семейде 13 жобаны, аудан орталықтарында 7 жобаны қамтиды.
Сондай-ақ өңірде «Tomorrow School» білім беру жобасын ашу және стартап экожүйесін дамыту үшін «Semy-Hub» өңірлік хабын құру жоспарланып отыр.
Кеңес қорытындысында аймақ басшысы цифрландыру басқармасына Мемлекет басшысының жасанды интеллектіні дамыту жөніндегі тапсырмаларын орындау үшін нақты индикаторлары бар іс-шаралар жоспарын әзірлеуді тапсырды. Сонымен бірге агробизнес өкілдерімен инновациялық технологияларды енгізу жұмысын күшейтіп, цифрландыруды енгізген кәсіпорындарды ынталандыру бойынша ұсыныстар беру міндетін жүктеді.
«Президенттің Жолдауда белгілеген міндеттерін жүзеге асыру еліміздің бәсекеге қабілеттілігін арттырып, экономиканың барлық саласын жаңғыртуға ықпал етеді. Жалпыұлттық жоспарға сәйкес ауыл шаруашылығы, жер, қаржы, өнеркәсіп, сауда, көлік-логистика, құрылыс, әлеуметтік қамсыздандыру, денсаулық сақтау, білім беру және табиғи ресурстарды пайдалану салаларына жасанды интеллектіні енгізуіміз қажет», – деді Берік Уәли.
