Semeytany.kz – Абай облысының әкімі Берік Уәли қазақстандық танымал саяхатшы, видеоблогер Дастан Мұхамедрахыммен кездесті.
Дастан Мұхамедрахым – Абай облысы Ақсуат ауданына қарасты Қызылкесік ауылының тумасы. Ол гиперлапс форматында түсіретін ерекше бейнероликтері арқылы табиғат көріністерін заманауи үлгіде көрсетіп, көпшілікке кеңінен танылған. Блогердің жұмыстары Қазақстанның туристік әлеуетін халықаралық деңгейде насихаттауға үлес қосып келеді.
Жақында Францияның Канн қаласында өткен WIBA Awards 2026 халықаралық марапаттау рәсімінде Дастан Мұхамедрахым «Әлемнің үздік travel-блогері» аталымын жеңіп алды. Ол өз еңбектерінде еліміздің асқар таулары мен кең даласын, ерекше табиғи ландшафттарын көркем түрде бейнелеп, шетелдік аудиторияға да Қазақстанның сұлулығын танытып жүр.
Саяхатшы блогер алғаш рет Қазақстан табиғаты туралы түсірген видеолары арқылы кеңінен танылып, бүгінде әлеуметтік желіде үлкен аудитория жинаған. Қазір оның Instagram парақшасында 1,5 миллионнан астам оқырманы бар.
Кездесу барысында аймақ басшысы Дастан Мұхамедрахымның шығармашылығына жоғары баға беріп, оның елдің, соның ішінде Абай облысының туристік имиджін қалыптастыруға қосып жүрген үлесін атап өтті. Облыс әкімі блогерге өңір жұртшылығы атынан алғыс айтып, алдағы жұмысына табыс тіледі.
