Semeytany.kz – Абай облысының әкімі Берік Уәли Семей қаласындағы бірқатар сауда нысандарын аралап, олардың санитарлық жағдайы мен абаттандырылу деңгейін тексерді.
Аймақ басшысы құқық қорғау және санитарлық-эпидемиологиялық қызмет өкілдерімен бірге қала орталығындағы «Нива» сауда үйі, «Жансая» базары және «Мың бастау» сауда орталығын аралады. Тексеру барысында халық көп шоғырланатын орындардың бірқатары талапқа сай емес екені анықталды.
Мәселен, 1985 жылы салынған «Нива» сауда үйінің маңында ескі дүңгіршіктер орнатылған, баспалдақтары тазаланбаған, ал ғимарат төбесінен су ағып тұр. «Жансая» базарының қасбеті де жаңартуды қажет етеді, сыртындағы контейнерлер мен ішкі сауда орындары ескірген.
Облыс әкімі жауапты мекемелерге бұл кемшіліктерді қысқа мерзімде жоюды тапсырды. Сонымен қатар, қала әкімдігіне кәсіпкерлік басқармасы, санитарлық-эпидемиологиялық бақылау департаменті және құқық қорғау органдарымен бірлесіп, заң талаптарын бұзған сауда нысандарына тексеріс жүргізуді міндеттеді.
Берік Уәли «Таза Қазақстан» бағдарламасы аясында тазалық жұмыстары күшейтілетінін айтып, кәсіпкерлерді жауапкершілікке шақырды. Оның айтуынша, талапты орындамағандарға айыппұл салынады.
«Қаланың дәл ортасындағы сауда орындарының мұндай жағдайда болуы – жол берілмейтін жайт. Семей – бәріміздің ортақ үйіміз. Оны таза ұстау әр азаматтың міндеті. Кәсіпкерлер өз нысандарының тазалығына бейжай қарамауы тиіс. Ескертуге құлақ аспағандар жауапқа тартылады», – деді аймақ басшысы.
Полиция департаментінің мәліметіне сәйкес, «Таза Қазақстан» бағдарламасы аясында жыл басынан бері 3 616 құқық бұзушылық тіркеліп, 12,3 млн теңге айыппұл салынған. Тағы 3 178 адамға ескерту берілген. Сонымен қатар, бейнебақылау камералары арқылы 291 құқық бұзушылық анықталған.
Облыс әкімі сауда нысандарының басшыларына жаңғырту және абаттандыру жобаларын әзірлеп, бекітуді тапсырды. Үш айдан кейін бұл жұмыстардың орындалуы арнайы тексерілетінін ескертті.
Айта кетейік, өткен жылы өңірде өткен сенбіліктерге 349 мыңнан астам адам қатысып, 52 мың тонна қоқыс шығарылған. 70 мыңнан астам көшет отырғызылып, 191 заңсыз қоқыс орны жойылған. Сонымен қатар, «Үлгілі ауыл» байқауы аясында белсенділік танытқан 20 ауылға жаңа тракторлар табысталған.
