Semeytany.kz – Абай облысы мен Қытайдың Шыңжаң ұйғыр автономиялы өлкесіне қарасты Тарбағатай округі арасындағы ынтымақтастықты дамыту мәселелері онлайн форматта өткен кездесуде талқыланды.
Облыс әкімі Берік Уәли Қытай тарапының өкілі – Тарбағатай округі партия комитетінің хатшысы Чжи Сянь Вэймен бейнеконференция арқылы пікір алмасты. Жиынға өңірлік басқарма басшылары мен департамент жетекшілері қатысып, шекаралық аудандардың әкімдері де бейнережимде қосылды.
Кездесу барысында «Тачэн – Аягөз» теміржол желісінің құрылысы, «Бақты – Покиту» өткізу пунктінде «Жасыл дәліз» қалыптастыру, шекара инфрақұрылымын жетілдіру және құқық қорғау органдары арасындағы өзара іс-қимылды күшейту мәселелері қаралды. Сонымен қатар, Тарбағатай аймағымен сауда-экономикалық байланыстарды кеңейтуге басымдық берілді.
Бүгінде Қазақстан–Қытай шекарасында ұзындығы 303 шақырым болатын «Бақты-Аягөз» теміржол учаскесінің құрылысы жүргізілуде. Жоба аясында ондаған көпір мен жүздеген су өткізгіш нысан салу жоспарланған.
«Бақты – Покиту» өткізу пункті де екі ел арасындағы маңызды логистикалық бағыттың бірі саналады. Қазіргі таңда ол штаттық режимде жұмыс істеп тұр. Өткізу қабілетін арттыру, рәсімдерді жеңілдету және көлік қозғалысын жеделдету бағытында екі тарап бірлескен шаралар қабылдауда.
Өңірде Қытай инвесторларының қатысуымен жалпы құны 2,2 млрд долларды құрайтын 10 жоба іске асырылып жатыр. Бұл жобалар өндіріс пен логистика салаларын дамытуға бағытталған.
Кездесу қорытындысында тараптар өңіраралық әріптестікті одан әрі нығайтуға дайын екендерін білдірді. Облыс әкімі қытайлық әріптестерді алдағы инвестициялық форумға шақырса, Чжи Сянь Вэй өз кезегінде Аягөз–Тачэн теміржолы мен «Бақты» бекетін дамытуға қатысты ұсыныстарын айтып, қазақстандық делегацияны Тачэн қаласында өтетін форумға қатысуға үндеді.
