Semeytany.kz – Жарма ауданының Ортабұлақ ауылында «Таза Қазақстан» бағдарламасының «Мөлдір бұлақ» акциясы аясында экологиялық шара өтті. Тазалық жұмыстары жергілікті халық үшін киелі саналатын «Әулие бұлақ» бастауының маңында ұйымдастырылды.
Іс-шараға облыс әкімі Берік Уәли қатысып, ауыл тұрғындарымен, зиялы қауым өкілдерімен және жастармен бірге бұлақ айналасына шырша көшеттерін отырғызды.
«Әулие бұлақ» – Ортабұлақ ауылы тұрғындары үшін ерекше маңызы бар табиғи су көзі. Жергілікті жұрт бұлақ суын емдік қасиетімен байланыстырады. Айтуларынша, мұнда асқазан, тері ауруларына шипа іздеп келетіндер де бар.
Шара барысында аймақ басшысы «Таза Қазақстан» бастамасының бір реттік науқан емес, жыл бойы жалғасатын ортақ мәдениетке айналуы қажет екенін атап өтті. Берік Уәлидің айтуынша, өткен жылы облыста 135 өзен, бұлақ және су айдындарының жағалауы тазартылып, 141 тонна қоқыс шығарылған. Биыл 14 бұлақтың көзі ашылып, айналасы абаттандырылған.
Облыста «Таза Қазақстан» акциясы аясында жүйелі жұмыстар жүргізіліп келеді. Былтыр өңірдегі сенбіліктерге 349 мыңнан астам адам қатысып, 52 мың тонна қоқыс шығарылды. Сондай-ақ 70 мыңнан астам көшет отырғызылып, 191 рұқсат етілмеген қоқыс орны жойылды.
Биылғы 3 сәуір мен 31 мамыр аралығында санитарлық-экологиялық екі айлық өтуде. Осы кезеңде 29 643 тұрғын, 2040 ұйым және 461 техника жұмылдырылған. Нәтижесінде 12 218 аула, 97 саябақ пен сквер, 57 ескерткіш аумағы тазартылып, 2897 тонна қатты тұрмыстық қалдық шығарылды.
Абай облысында 2024-2029 жылдарға арналған «Таза Қазақстан» тұжырымдамасын іске асыру бойынша 44 іс-шарадан тұратын жоспар бекітілген. Биыл 32 іс-шараны жүзеге асыру көзделіп отыр. Көгалдандыру жұмыстары аясында өңірде 67 мың ағаш отырғызу жоспарланған. Сонымен қатар 240 гектар аумақты қамтитын автомобиль жолдарының бойында орман жолақтарын отырғызу жұмыстары жүргізілуде.
