Сейсенбі, 29 қыркүйек күні қалалық әкімдікте Семей қаласы әкімінің жанындағы қоғамдық кеңестің кезекті отырысы өтті. Жиынға қала әкімі Ермак Сәлімов пен қалалық мәслихат хатшысы Бейсенбек Ақжалов қатысты.
{jcomments on}Жиынды кеңес төрайымы Жанна Жибраева ашып, күн тәртібінде қаралатын мәселелерді таныстырып өтті. Қаралған мәселелер бойынша ең алдымен Шығыс Қазақстан облысы әкімінің жанындағы қоғамдық кеңестің төрағасы Владимир Лопаткин сөз алып, облыстық қоғамдық кеңестің жұмысы туралы баяндады. Владимир Лопаткиннің айтуынша, өңірдегі көптеген қоғамдық ұйымдардың басын біріктіретін Шығыс Қазақстан облысы әкімінің жанындағы қоғамдық кеңес облыс аумағында туындаған келелі мәселелерді шешуге атсалысып келеді.
— Құрамына кәсіби мамандар кіретін облыстық қоғамдық кеңес отырысында кез келген мәселе талқыланып, оң шешілуіне ықпал жасалады. Әрине, бұл өз кезегінде қоғамдық кеңестің беделін арттырып, кәсіби тұрғыдан шеберлігін шыңдай түсуде. Айта кетуіміз керек, бүгінгі күні Шығыс Қазақстан облысы бойынша қала мен аудандарда 19 қоғамдық кеңес жұмыс жүргізуде. Ал облыстық қоғамдық кеңес өңір бойынша барлық аудандарда көшпелі отырыстарын өткізіп келеді. Ондағы мақсат — қоғамда туындаған кез келген мәселені халық арасында талқылап, тиімді шешу жолына ықпал жасау, — деді В.Лопаткин.
Сонымен қатар Шығыс Қазақстан облысы әкімінің жанындағы қоғамдық кеңестің денсаулық сақтау жөніндегі сараптамалық жұмыс тобы төрағасының орынбасары Индира Кәкімова баяндама жасады. Оның айтуынша, аталмыш жұмыс тобы облыстық денсаулық сақтау департаментімен тығыз әріптестік байланыс орнатқан. Аудандарға шығып, аталған салада туындаған мәселелер анықталып, кеңес отырысында талқыланып, ортақ шешім қабылданады екен.
Сондай-ақ Индира Болатқызы еліміздегі денсаулық сақтау жүйесіндегі жаңа модельдің негізгі принциптері жайында да сөз қозғады. Оның пайымынша, соңғы жылдары денсаулық сақтау саласына жасалған жағдайлар бәсекеге қабілетті үлгі қалыптастыруға мүмкіндік берген.
Отырыста негізгі азық-түлік тауарларының бағасын реттеу мәселесі де қоз-ғалып, ол бойынша қалалық кәсіпкерлік бөлімінің басшысы Марат Нүгеров баяндады. Бөлім басшысы бүгінде қаладағы азық — түлік бағасын бақылау мақсатында штаб, оның аясында арнайы жұмыс тобы құрылғаны жайында айтып өтті.
— Соңғы мәліметтер бойынша, қалада 1149 азық-түлік дүкені бар. Жұмыс тобы осы дүкендерді күніне екі рет аралап, тәулігіне 300-400 дүкендегі баға тұрақтылығына мониторинг жүргізеді. Сонымен қатар тұрғындармен байланыс орнату мақсатында сенім телефоны жұмыс істейді. Айта кетуіміз керек, арнайы желіге 20 тамыз бен 28 қыркүйек аралығында 157 тұрғын қоңырау шалған. Әлеуметтік маңызы бар тауарлардың негізсіз көтерілгені анықтал-ған жағдайда, сауда орнына сала мамандары шығып, түсіндіру жұмыстарын жүргізеді, — деген кәсіпкерлік бөлімінің басшысы Марат Нүгеров, жалпы, рейд тұрақты жүргізіліп тұратынын, бағаның негізсіз көтерілгені анықталса, түсіндіру шаралары өткізілетінін атап өтті. Сонымен қатар ол бағаны тұрақтандыру мақсатында сауда үйлерінің жетекшілерімен 927 меморандумға қол қойылғанын жеткізді.
Отырыс соңында Семей қаласындағы консультативтік-диагностикалық орталықтың Ұранхаев көшесі, 20 мекенжайында орналасқан бөлімшесі ғимаратының тарлығы да сөз болды. Бұл жайында мекеме жетекшісі Жанат Тұрсын-ғалиева мәселенің жылдар бойы шешілмей келе жатқанын айтты. Оның айтуынша, емдеу мекемесінің 88 шаршы метр аумағында жүзден астам медицина қызметкерлері жұмыс жасауда. Ал қызмет көрсететін тұрғындардың саны 3 мыңға жуық екен. Бір сөзбен айтқанда, еш талапқа сай келмейтін ғимарат аумағын кеңейту керек. Жиын соңында аталған мәселенің алдағы уақыттарда талқыланып, шешу жолдары қарастырылатыны сөз болды.
Асан МЫРЗАХАНОВ,
«Семей таңы»
