Қаңтар айының аяғы мен ақпан айында жедел респираторлы вирустық жұқпаның (ЖРВЖ) белең алатын шағы. Өткен жылдың қазан айынан бастап бүгінгі күнге дейін Семей өңірі бойынша ЖРВЖ–мен ауырғандар саны 8 564 адамды құраса, оның 73,6%-ы балалар болған. Бұл туралы өткен бейсенбі күні БАҚ өкілдеріне арналған баспасөз мәслихатында мәлім болды.
Баспасөз мәслихатына Семей қаласының бас инфекционисі Эльвира Исабаева, қалалық тұтынушылардың құқықтарын қорғау басқармасы эпидемиологиялық бақылау бөлімінің жетекшісі Айгүл Тоқтабева және жедел медициналық жәрдем емханасы директорының емдеу ісі бойынша орынбасары Ғалия Әлімбаева қатысты.
Жедел респираторлы вирустық жұқпа (ЖРВЖ) тыныс алу жолдарын қабындырып, ауа арқылы берілетін полиэтиологиялық аурулар тобына жатады екен. Ақ халаттылар күз, қыс және көктем мезгілінде аталмыш вирустық жұқпамен ауыратындар саны көбейетінін айтады. Бұл ретте жұқпаның алдын алудың бірден–бір жолы — вирусқа қарсы екпе алу. Семей қалалық тұтынушылардың құқықтарын қорғау басқармасы эпидемиологиялық бақылау бөлімінің жетекшісі Айгүл Тоқтабева осы бағытта бірқатар шаралар қолға алынғанын жеткізді.
— 2015 жылдың қазан-қараша айларында тұмау вирусының алдын алу мақсатында қала көлемінде вакцинация жұмыстары жүргізілді. Нақтылап айтқанда, 30 мыңнан аса тұрғынға осы жұқпаға қарсы екпе салынды. Жергілікті бюджет есебінен 1200-ге тарта қала тұрғындары вакцинацияны тегін түрде алды. Олардың дені әлеуметтік жағдайы төмен жандар екенін айта кеткен абзал. Жалпы, өткен жылмен салыстырғанда ЖРВЖ-мен ауырғандардың саны біршама төмен,- дейді Айгүл Төлеген-қызы.
Ал Семей қаласының бас инфекционисі Эльвира Исабаева қаладағы жұқпалы аурулар емханасының 140 адамды бір мезетте қабылдауға қауқары жететінін, қазір жағдайдың тұрақты екенін атап өтті.
— ЖРВЖ–ның жұқпалы екенін естен шығармаған абзал. Алайда өткен жылмен салыстырғанда вирустық жұқпамен ауырғандар саны едәуір төмен. Дегенмен де осы ретте қалалықтардан сақтық шараларын мейлінше қатаң ұстануын сұраймыз. Ең алдымен жеке бастың гигиенасына баса мән берген жөн. Жөтелген сәтте инфекцияны таратпау мақсатында қол орамалын қолдану керек. Сондай-ақ пәтеріңіздегі ауаны жиі тазартып отыруды да ұмытпаған абзал. Дертті асқындырып алмау үшін дәл уақытында тұрғылықты мекенжайыңыз бойынша учаскелік дәрігерге қаралған дұрыс болады,- дейді қаланың бас инфекционисі.
«Ауырып ем іздегенше, ауырмайтын жол ізде»,- деп халық даналығында айтылғандай, ағзаларыңызға зиян келмес үшін, жоғарыда айтылған мамандардың кеңесіне құлақ ассаңыздар, ұтылмайтындарыңыз анық. Себебі қазіргі нарық заманында экономикалық тұрғыда ауырмаған тиімді екені даусыз.
Жақсылық МҰРАТҚАЛИҰЛЫ,
«Семей таңы»
