Жыл өткен сайын шаһарымызда түрлі ойын-сауық орындары, тойхана мен мейрамханалар көптеп ашылуда. Оларға барып, бос уақытын өткізетін, тойлар мен көңілді кештер ұйымдастыратындар қатары да баршылық. Бұл, әрине, тұрғындардың әл- ауқатының жақсарып, мәдениетінің көтерілгенін көрсетеді. Ал, таяуда ғана Абай көшесінің бойынан ашылған «Антикафе» атты демалыс орнының тұрғындарға қызмет көрсетуі өзгелерге қарағанда өзгерек. Антикафе — бос уақытты тиімді өткізуге арналған бірден-бір мәдени орын. 2012 жылы алғаш рет Мәскеуде ашылған мұндай мекемелер бүгінгі таңда еліміздің де біршама қалаларында жұмыс істеп тұрған көрінеді. Ал, Семейдегі Антикафе өз жұмысын өткен жылдың 16 желтоқсанында бастаған.
Ойын-сауық кешендерімен салыстырғанда бұл мекеменің өзгешелігі — мұнда келгендерге дөрекі сөйлеуге, шылым шегіп, ішімдік ішуге тыйым салын-ған. Ал, көңіл көтеріп, бос уақытты тиімді өткізуге барынша жағдайлар жасалған. Атап айтқанда, кафе ішіне жайлы орындықтар мен үстелдер қойылған. Кітап сөресі де бар. Онда қазіргі заманғы жазушылардың таңдаулы шығармаларын кездестіруге болады. Сонымен қатар, заманауи жабдықтармен безендірілген мәдени орында түрлі аспаптарда және әртүрлі ойындар ойнауға болады. Тамылжыған әсем әуен де көңілдің көркін кіргізіп тұрады. Тіпті, сенбі-жексенбі күндері өнерпаздардың шағын концертін де тамашалауға мүмкіндік бар. Ал, кіру ақысы әр адам үшін минутына 5 теңге, яғни, 1 сағат-қа 300 теңге болса, төртінші сағаты тегін көрінеді. Демек, бір адам 4 сағат үшін 900 теңге төлеуі тиіс. Бірақ, мұнда ас мәзірі бойынша қызмет көрсетілмейді. Алайда, келушілердің сырттан әкелген асын антикафеде отырып, ауқаттануына болады. Есесіне, ыстық шай мекеме тарапынан тегін беріледі. Онда әзірге екі адам ғана жұмыс істеуде. Мекеме басшысы Ілияс Құрманғалиев пен оның досы Алтынбек Мұрзабеков келушілерге көңілді әрі жайлы болу үшін қолдарынан келгенше қызмет көрсетіп жүр. Идеяшыл жастардың бұл ісін құптаушылар да аз емес көрінеді. Келушілер санының да күн сайын артып келе жатқанын айтады олар.
{jcomments on}- Мұнда бос уақыттарын тиімді әрі ерекше өткізгісі келетін жастар жиналады. Алайда, жас жағынан бізде шектеу жоқ. Орта жастағы адамдар да келе бастады. Қандай жастағы адамдар болмасын, келем деушілерге қашан да есік ашық. Тек ішімдік ішкендерге ішке кіруге жол жоқ. Өйткені, мұнда бұзақылық қылықтың орын алуына жол берілмейді, қауіпсіздікті бірінші орынға қоямыз. Полиция пункті де мекемеден алыс емес. Сондықтан, антикафеге келушілердің алаңсыз отыруына бар мүмкіндік қарас-тырылған, — деген Ілияс, — алдағы уақытта мекеменің безендіруін тағы да жаңартпақ ойлары бар екенін, мекеменің бір бұрышына қаладағы қылқалам шеберлері мен фотосуретшілердің таңдаулы туындыларын сатылымға қойып, көрме өткізу де жоспарланып отырғандығын жеткізді. Сондай-ақ, антикафеде балалардың ертеңгілігі мен шағын ұжымдардың думанды кештерін де өткізуге болады. Бірақ, орын саны шектеулі. 27 орынға арналған мекеме 40 адамға дейін қызмет көрсетуге қауқарлы. Ілияс Құрманғалиев антикафеде уақыт өткізу, келушілердің қалтасына да аса қатты салмақ түсірмейтінін айтады. Алайда, олардың жарнамасы тек ғаламторда болғандықтан, осындай мәдениет орнының ашылғаны туралы жаңалық қала тұрғындарының көпшілігінің құлағына әлі де жете қоймаған тәрізді. Шаһар тұрғындары мен қала қонақтарына антикафе дүйсенбі-бейсенбі күндері аралығында түскі уақыттан кешкі сағат 21.00-ге дейін, ал, жұма-жексенбі күндері аралығында түнгі сағат 23.00-ге дейін жұмыс істейтінін де айта кетуді жөн көрдік.
Жастарымыз тарапынан осындай салауатты өмір салтын ұстанатын орындардың ашылуы құптарлық іс деп есептейміз.
Нұрдәулет КӘКІШЕВ,
«Семей таңы».
