Туған өңіріміздің таза әрі көрікті болуын қамтамасыз етуге үлес қосу тек қана жергілікті атқарушы билік орындарының міндеті емес, әрбір қала тұрғынының азаматтық борышы екеніне түсіністікпен қарай бастағандаймыз. Олай дейтініміз — шаһар басшысының бастамасымен тазалық шараларын атқаруға қатысты жарияланған екі айлық аясындағы жалпықалалық сенбілікке жұртшылықтың басым көпшілігі белсене атсалысты. Өткен сенбі, 9 сәуір күні қала тұрғындары құрал — саймандарын сайлап, тазалық жұмыстарына жұмыла кірісті.
— Әрбір қоғамның саналы азаматы өзі тұратын үйін, өзінің айналасын, жұмыс істейтін қызмет орнын таза ұстауға міндетті деп ойлаймын. Сондықтан біздің ұжым жыл сайын ұйымдасқан түрде, ешкімнің нұсқауын күтпей–ақ тазалық шараларын өткізіп тұрады. Сен-біліктерге белсене атсалысып, тазалық жұмыстарына араласып жүрген жандар тазалықтың қадірін жақсы біледі және өздері ешқашан қоқыс тастамайды. Осындай шаралар әсіресе жастарға өте қажет. Балаларды, біріншіден, еңбекке, ұйымшылдыққа үйретеді,- дейді Р.Байсеитов атындағы Семей қаржы – экономикалық колледжі директорының орынбасары Бақытгүл Бақтиярова.
Айтқандай-ақ, колледж ұжымы, өздерінің жұмыс орны маңынан бөлек, орталық көшенің біраз бөлігіне тазалық жұмыстарын жүргізді. Расында, қаланың мұнтаздай таза қалпын сақтауға өз үлестерін бұрыннан қосып келе жатқан осындай ұжымдар баршылық. Сонымен қатар қала орталығының тазалығын реттеуге өзге де мекемелер қатысты.
Айта кетейік, Семей қаласы әкімінің қаулысына сәйкес, сәуір және мамыр айлары аралығында қаланы абаттандыру, көгалдандыру және санитарлық тазалық жұмыстарын ұйымдастыру екі айлығы бекітілген болатын. Осыған сәйкес, қала аумағында орналасқан барлық мекемелерге арнайы хабарлама таратылып, келісім бойынша көше аумақтарының тазалық жұмыстары бекітілді.
Асан МЫРЗАХАН,
«Семей таңы»
