Жұма, 29 шілде күні Семей қаласының әкімдігінде қала әкімі Ермак Сәлімовтің төрағалығымен қала әкімдігінің кезекті отырысы өтті. Әкімдің отырысына дербес бөлім басшылары, ауылдық округтер әкімдері қатысты. Күн тәртібіне сәйкес қалалық қаржы бөлімінің басшысы Роза Құдайбергенқызы және экономика және бюджеттік жоспарлау бөлімінің басшысы Гүлжан Алтынбекованың баяндамалары тыңдалды.
Бірінші сұрақ бойынша «2016 жылғы бірінші жартыжылдыққа қала бюджетінің атқарылуы туралы» ақпарат берілді. 2016 жылғы қала бюджетінің нақтыланған көлемі 24 480 млн. теңгені құрайды. Ағымдағы жылдың 1 шілдесіне меншікті кірістер бойынша 6 987,2 млн. теңге жоспарланып, 7 115,5 млн. теңге немесе жоспардан тыс 128,3 млн. теңге түсті. Аталмыш көрсеткіш 2015 жылдың осы кезеңінмен салыстырғанда өсу қарқыны 108,8 % — ға жетті.
Ағымдағы жылдың 1 шілдесіне еңбекақы және әлеуметтік төлемдер төленіп, 2015 жылғы қала бюджетінің кредиторлық берешегі толық көлемде өтелді. 2016 жылдың бірінші жарты жылдығында бюджеттің орындалу қорытындысынан, ағымдағы жылдың соңына дейін бюджеттік бағдарламалар әкімшілеріне бюджеттің толық орындалуына және түпкі нәтижеге қол жеткізуге бағытталған негізгі міндеттерді шешуге тура келеді. Оның ішінде, мемлекеттік уәкілетті органдармен бюджеттің меншікті кірістері бойынша болжамның орындалуы үшін салық салынатын базаны ұлғайту, еңбекақы және басқа да ақшалай төлемдерді жүргізу, жоғары тұрған бюджеттен трансферттердің болжамды орындалуына талдау жасау, құрылыс және реконструкциялау объектілеріне жұмыстың өндіріс кестесінің орындалуы бойынша қатаң бақылауды қамтамасыз ету, негізсіз дебиторлық және кредиторлық берешектердің қалыптасуына жол бермеу жұмыстарын атқару қажет.
Субъективті себептер бойынша конкурстық рәсімдерді уақтылы өткізбеу және нысандарда өндіріс жұмыстарының жүзеге асырылуына бюджеттік бағдарлама әкімшілері тарапынан бақылаудың жоқтығынан бюджеттен бөлінген қаржаттың игерілмеу фактілері орын алды. Қала әкімі ақпаратты назарға алып, негізсіз қаражат қалдығына жол беруіне байланысты сәйкес бюджеттік бағдарлама әкімшілерінің басшыларына мемлекеттік сатып алу жұмысына жауап беретін мамандардың жауапқа тарту мәселесін қарастыруды қатаң тапсырды. Осыған дейін тиісті сөгісті бөлім басшыларына жарияланған болатын. Қала басшысы бөлінген қаражатты игеру басты міндеттердің бірі болып саналатынын атап өтті.
Сонымен қатар әкімдік отырысында 2016 жылғы бірінші жартыжылдыққа әлеуметтік – экономикалық даму қорытындылары туралы экономика және бюджеттік жоспарлау бөлімінің басшысы Г. Алтынбекованың баяндамасы тыңдалды. Ағымдағы жылы әлеуметтік-экономикалық дамудың негізгі көрсеткіштерінің оң серпіні байқалуда. Мәселен, 2016 жылғы І жартыжылдықтағы рейтингтік бағалау көсеткіштерін ай сайынғы мониторингілеу қорытындысы қаланың орта серпінді даму аймағына жатқызылғанын көрсетіп, 8 орынды иеленді. Есептік кезеңде өнеркәсіп өнімінің көлемі 67,5 млрд. теңгені құрады, бұл алдыңғы жылмен салыстырғанда 8,2 млрд. теңгеге жоғары. 2016 жылғы 6 айда өңдеу өнеркәсібінде 50,7 млрд. теңге көлемінде өнім шығарылды. Бұл 2015 жыл деңгейінен 9,1 млрд. теңгеге жоғары. Металл өнеркәсібінде өнеркәсіп өнімін шығару 2,1 есеге немесе 9,6 млрд. теңгеге жоғарылады және 18,03 млрд. теңгені құрады.
«Бизнестің жол картасы — 2020» бизнесті қолдау және дамытудың бірыңғай бағдарламасы шеңберінде 2016 жылдың басынан бері жалпы көлемі 842,6 млн. теңгеге 20 шартқа қол қойылып, оларға 15,5 млн. теңге субсидия төленді және кепілдік бойынша 49,4 млн. теңгеге 2 келісімге қол қойылды. Бұл ретте 800 орынға 5 жекеменшік балабақша енгізу жоспарлануда. Балаларды жергілікті мектепке дейінгі мекемелердегі орындармен қамту мәселесін шешу мақсатында, Ұшақтар кентінде 280 орынға арналған, Суық бастау кентінде 230 орынға арналған балабақшалар және Водный кентіндегі 100 орынға арналған мектепке дейінгі шағын орталыққа қосымша құрылысына жобалау-сметалық құжаттамалар әзірленді.
Соңғы үш жылда денсаулық сақтау жүйесінде тұрғындарды сауықтыруда оң тенденция барын атап өту қажет. Туберкулезбен ауыру (қала бойынша 7,1 %-ға төмендеді), туберкулезден өлім-жітім (1,9 %-ға), онкологиялық аурулардан (5,4 %-ға) көрсеткіштері қысқарған. Ана өлімі жағдайы тіркелмесе, нәрестенің шетінеуі 4,7 %-ға төмендеді.
Ермак Бидахметұлы ақпаратты назарға алып, әр көрсеткішке жауапты орындаушылар бекітіуді, оларға статистика органдарымен ғана емес, облыстық салалық басқармалармен де облыстың қалалары мен аудандары арасындағы ауданішілік рейтингті қорытындылауға дейін тұрақты түрде тығыз ынтымақтастықта жұмыс істеуді тапсырды.
Сонымен қатар дала өрттерін сөндіру мәселелері жөніндегі қала әкімінің тапсырмаларының орындалу барысы туралы Семей қаласының төтенше жағдайлар басқармасының басшысы м.індетін атқарушы Б. Байбуров пен қала әкімі аппаратының қаржы-шаруашылық жұмыс бөлімі басшысының міндетін атқарушы С. Қуанышбаева ақпарат берді. Өрт сөндіру жұмыстарына қаражат толыққанды бөлініп, игерілді. Жанармай сатып алынып, бүгінгі күні дала өртін алдын алу мақсатында ауылдық округтерде тиісті жұмыстар жүргізілуде.
Семей қаласы әкімінің баспасөз қызметі.
