Қазақстан Республикасы Пар-ламентінің Сенат депутаты, жерлесіміз Дүйсенғазы Мусин таяуда 2019 жылдың бюджетін нақтылауға арналған Сенат отырысында ауылды өркендету, ауыл шаруашылығы өндірісін арттыру, агроөнеркәсіп кешенін мемлекеттік тұрғыдан қолдау мен дамытудың бағдарламаларына арналған «Ауыл – Ел бесігі» атты арнайы жобаны жүзеге асырудың бірыңғай саясаты жайлы сөз сөйлеген болатын.
Төменде Дүйсенғазы Мағауя-ұлы Мусиннің ҚР Парламентінің жоғарғы палатасында сөйлеген сөзін газет оқырмандарының назарына қаз қалпында ұсынып отырмыз.
Құрметті Дариға Нұрсұлтанқызы!
Құрметті әріптестер мен шақырылғандар!
Бүгінгі бюджетті нақтылау туралы заң жобасының басты ерекшелігі бюджеттік шығындардың басымдықтарын қайта қарау арқылы халықты әлеуметтік қолдауды күшейту болып табылады.Тұңғыш Президент — Елбасы 2018 жылғы 5 қазанда Қазақстан халқына арнаған Жолдауында ауыл тұрғындарының әл-ауқатын, өмір сапасын арттыру, АӨК-нің әлеуетін толық іске асыру керектігін міндеттегені өздеріңізге мәлім.
Сонымен қатар «Nur Otan» партиясының ХVIII съезінде осы мақсатта «Ауыл – Ел бесігі» арнайы жобасын іске асыру туралы ұсыныстар әзірлеуді және 2019-2021 жылдары аталған жобаны жүзеге асыруға 90 млрд. теңге көлемінде қаржы бөлуді тапсырған болатын.
Бүгінгі талқыланып отырған заң жобаларында аталмыш қаржы қарастырылып, біздегі бар ақпараттар бойынша, жоба қағамдық сананы жаңғырту арқылы ауылға деген көзқарасты өзгерту, саланың мәртебесін көтеру, АӨК-ін дамыту және ауылдық аумақтарды жаңғыртуға басымдықтары мен әлеуеті мол елді мекендерді дамыту арқылы қол жеткізу бағыттары бойынша жүзеге асырылмақ.
Дегенмен жоба шеңберінде халықтың тығыздығы, инфрақұрылымның жағдайы, жаңа жұмыс орындарын ашу мүмкіндігі мол 1781 елді мекен іріктелгенімен осы жобаны іске асыруға бағытталған ұйымдастыру шаралары және аймақтық стандарттар жүйесін әзірлеу жұмыстарының бүгінге дейін аяқталмағанын атап өту керек.
Бұл кемшіліктер жақында Парламент Мәжілісінде АӨК-ін дамыту бойынша заң жобасын талқылау барысында да айтылып өтті.
Бүгінгі күнгі «Ауыл – Ел бесігі» атты арнайы жобасын ҚР Президентінің Жарлығымен бекітілген Ауылдық аумақтарды дамытудың 2004 – 2010 жылдарға арналған мемлекеттік бағдарламасының уақыт талабына сай жалғасы ретінде санауға болады.
Сондай-ақ өткен жылы ҚР АӨК-ін дамытуға және Өңірлерді дамытуға арналған екі маңызды мемлекеттік бағдарламалар қабылданғаны мәлім.
Осы арайда аталған бағдарламалардың шеңберіндегі мақсаттар мен міндеттердің орындалуына жауапты мемлекеттік органдар бюджеттен бағытталып отырған қыруар қаржыны ең алдымен «тірек» ауылдық елді мекендер мен даму әлеуеті жоғары ауылдардың инфрақұрылымдарын дамытуға тиімді түрде игергендері жөн деп санаймын.
Жалпы алғанда, мемлекет тарапынан ауылдық аумақтарды дамыту бойынша қабылданған бағдарламалар жеткілікті, алайда оларды халық игілігіне іске асыруда жүйелі жұмыстарды жүргізетін жауапты және үйлестіруші нақты мемлекеттік органды анықтау қажет.
Сонымен қатар агроөнеркәсіптік кешенді мемлекеттік қолдаудың барлық шараларын және ауылдық аумақтарды дамытудың сектораралық бағдарламаларын біріктіруді көздейтін «Ауыл – Ел бесігі» атты арнайы жобасын жүзеге асырудың бірыңғай саясаты айқындалуы тиіс деп ойлаймыз.
Аталған шара ауылдық аймақтарды басқаруда ведомствоаралық бытыраңқылықты еңсеруге, сондай-ақ орталық және жергілікті атқарушы органдар, үкіметтік емес ұйымдар мен бизнестің арасындағы үйлесімді күшейтуге өз әсерін тигізері сөзсіз.{jcomments off}
