ШҚО-да әлеуметтік маңызы бар азық-түлік тауарларының бағасын тұрақтандыру мақсатында нақты шаралар қабылданды.
Бұл туралы онлайн баспасөз конференциясы барысында кәсіпкерлік, ауыл шаруашылығы басқармаларының, сондай-ақ «Ертіс» әлеуметтік-кәсіпкерлік корпорациясының өкілдері мәлім етті.
Спикерлердің ақпараты бойынша, әлеуметтік маңызы бар азық-түлік тауарларына баға индексі ағымдағы жылдың басынан бастап Өскемен қаласы бойынша 102,7%-ды құраған, бұл орташа республикалық көрсеткіштен 0,3%-ға төмен. Семей қаласы бойынша 103% пайызды құраған, бұл — орташа республикалық көрсеткіш.
Облыс орталығында жыл басынан бері тоғыз тауар бойынша бағаның өсуі байқалды. Тауық жұмыртқасы 20 %, күнбағыс майы 9,6 %, қант 6,3 %, макарон өнімдері 4,6 % -ға қымбаттаған. Сондай-ақ қарақұмық, қырыққабат, сиыр еті, сәбіз, сары май бағасы да көтерілді.
Семейде тауық жұмыртқасы 22,4 %, күнбағыс майы 15,8 %, қант 4,5 %-ға қымбаттады. Қырыққабат, қарақұмық, пияз, сәбіз, сиыр еті бағасы көтерілсе, тауық еті мен күріштің бағасы төмендеген.
Кәсіпкерлік басқарма басшысының орынбасары Ольга Григорьеваның айтуынша, бағаны тұрақтандыру мақсатында бірқатар шаралар жүзеге асырылуда. 2,5 мың ауыл шаруашылығы тауарын өндірушілермен, көтерме сатушылармен және сауда нысандарымен ең төменгі — 10% сауда үстемесін қолдану туралы меморандум жасалған. Оларды жүзеге асыру үшін 44 әлеуметтік дүкен мен 465 әлеуметтік сауда орындары жұмыс істейді.
Жиында қалалар мен аудандардың әкімдіктері әлеуметтік маңызы бар азық – түлік тауарларын, оның ішінде жұмыртқа, күнбағыс майы, бірінші сұрыпты нанға ең төменгі — 7-10% сауда үстемесін қосу туралы меморандум жасалғаны айтылды.»Eco-Agro» ЖШС, «Каравай» ЖШС наубайханаларымен қаланың сауда объектілеріне ең төменгі құны бойынша бірінші сұрыпты нанды жөнелту туралы уағдаластыққа қол жеткізілген. Сатудың соңғы бағасы бір бөлке үшін 75 – 85 теңгені құрайды.
Күнбағыс майы бағасын төмендету үшін «Өскемен май зауыты» ЖШС кәсіпорнының басшылығымен күнбағыс майын қаланың әлеуметтік сауда орындарына 610 теңге бағамен жөнелту туралы меморандумға қол қойылды. «Май» АҚ, «Өскемен май зауыты», Востокселхозпродукт (күнбағыс майына), «Энпас» ЖШС (тауық жұмыртқасы), сондай-ақ екі көтерме сатушымен монополияға қарсы комплаенс жасалды.
Бұдан басқа әлеуметтік сауда объектілерінде халыққа 370 және 380 теңгеден сату үшін 350 және 360 теңгеден бірінші санаттағы жұмыртқаларды жөнелту бойынша келісімге қол жеткізілген. Бөлшек сауда бағаларының шекті мәндерінің 15 пайыздан жоғары артуына байланысты кәсіпкерлік және индустриялық-инновациялық даму басқармасы бірінші санаттағы тауық жұмыртқасына 405 теңге мөлшерінде шекті бағаларды бекіту жөнінде қаулы әзірлеген.
Облыста тұрақты негізде әлеуметтік маңызы бар азық-түлік тауарларына бағаның негізсіз өсуіне жол бермеу бойынша өңірлік штабтардың отырыстары өткізіліп тұрады. Жыл басынан бері 106 отырыс өткізілген.
Бағаны тұрақтандыру мәселесі тұрақты бақылауда.
«СТ» ақпарат
