Қала әкімі Айбек Кәрімовтің төрағалығымен құқықбұзушылықтың алдын алу жөніндегі ведомствоаралық комиссияның кезекті мәжілісі өтті. Жиында заңсыз есірткі тасымалдау, контрабандамен күресудің және нашақорлықтың алдын алу бойынша қабылданатын шаралар туралы мәселе сөз болды. Сондай-ақ, аталмыш комиссияның 2013 жылдың 25 желтоқсанындағы хаттамалық шешімінің орындалу барысы талқыланды.
Жиын барысында сөз сөйлеген Семей қалалық ішкі істер басқармасының басшысы Жұмабек Исаділов соңғы жылдары есірткі заттарын заңсыз сақтау мен сату деректері көбейіп кеткендігін жеткізді. Мәселен, былтырғы жылы өткізілген «Допинг», «Канал-Кавказ», «Көкнар-2013» жедел алдын алу шараларының нәтижесінде заңсыз есірткі айналымының 84 фактісі анықталған. Олардың 67-сі есірткі заттарын заңсыз сатуға, ал 17-сі сақтауға қатысты. Жедел алдын алу шаралары нәтижесінде заңсыз айналымнан 58 келі есірткі тәркіленіп, жойылған. Бұл көрсеткіш 2012 жылғымен салыстырғанда 14 келіге артық. Демек, өткен жылы қоғамның дертіне айналған есірткі тасымалдауға қарсы құқыққорғау органдарының жүйелі жұмыс жүргізгені байқалады.
— Қазіргі таңда «нашақор» категориясы бойынша 262 адам профилактикалық тіркеуде тұр. 2013 жылы осы санатқа 70 адам есепке алынса, 76 адам тіркеуден шығарылған. Алайда, сарапшылардың айтуынша, ресми мәлімет шындыққа сәйкес келмейтін көрінеді. Сондықтан, нашақорлықтың алдын алу шараларын қарастырған дұрыс. Бұл жерде сөз студенттер мен оқушыларды ерікті немесе мәжбүрлі түрде тестілеуден өткізу жұмыстарын жүргізу туралы болып тұр. Айта кетерлік тағы бір жайт, өкінішке орай, есірткіге тәуелділерді емдеу мен оңалту жүйесі тиімсіз әрі мүлде дамымайды. Мұның бір себебі, ішімдік құмарлар мен нашақорлардың бір жерде емделуінде. Сондықтан, тек есірткіге тәуелділерді медициналық-әлеуметтік оңалтуға арналған орталық ашу қажеттігі туындап тұр, — дейді Жұмабек Исаділов.
{jcomments on}Өз кезегінде қалалық наркологиялық диспансердің директоры Павел Брыжахин Ішкі істер басқармасы басшысының нашақорларды емдеуге арналған бөлек мекеме ашу туралы ұсынысын қолдайтынын жеткізді. Сондай-ақ, ол бұл мақсатта Шүлбі кентіндегі әлеуметтік нысандарды пайдалануға болатынын да тілге тиек етті. Себебі, диспансердегі арнайы бөлінген 70 орын тіркеуде тұрған нашақорларды емдеуге жеткіліксіз көрінеді.
Бұл орайда Айбек Мүталапханұлы облыстық денсаулық сақтау басқармасына есірткіге тәуелділерді оңалтуға арналған мекеме ашу туралы ұсыныс жасау керектігін атап өтті. Сондай-ақ, қала басшысы қалаға келетін есірткі заттарының қайдан шыққанын анықтау жұмыстарын жетілдіру керектігін де ескертті. Себебі, қала әкімі атап өткендей, еліміздің оңтүстігінен тасымалданатын өсімдік тектес есірткі заттарымен бірге өңірімізге көршілес Ресейден де синтетикалық есірткі заттары әкелінуі әбден мүмкін.
Жиын барысында екінші кезекте 2013 жылдың 25 желтоқсанында өткен құқықбұзушылықтың алдын алу жөніндегі комиссия мәжілісінің хаттамалық шешімінің орындалу барысы сөз болды. Отырысқа қатысушылар бұл бағыттағы жұмыстардың өз деңгейінде жүргізіліп жатқанын айта келе, алдағы уақытта олардың тиімділігін арттыра түсудің жолдарын сөз етті.
Мирас ҚҰСАЙЫН,
«Семей таңы»