Ел Тәуелсіздігінің 30 жылдығына орай Ұлттық ат туризм федерациясының «Нұр-Сұлтан – Жидебай» бағытындағы бірнеше күндік сапары мәресіне жетті.
Елбасы Н.Ә.Назарбаев «Ұлы даланың жеті қыры» атты мақаласында атқа міну өнеріне ерекше тоқталып, ержүрек, батыр бабаларымыздың ат тұяғын тоздырар, құс қанатын талдырар ұлан-ғайыр даламызды ақбілектің күшімен, ақ найзаның ұшымен қорғаған ерлігін, рухын ұрпаққа ұлықтау керектігін атап өтеді.
Есіл жағасынан атқа қонған еріктілер кездейсоқ жандар емес. Қара сөзде қамшы салдырмас бұлбұлдар ме дүлдүлдер. Атап айтсақ, Ұлттық ат туризм федерациясының президенті Берік Ақылбеков, Целиноград ауданы әкімдігінің баспасөз хатшысы, журналист, ұстаз Дидар Оралбек, «baq.kz» сайтының журналисті Ержан Жаубай, орманшы, атбегі Таңжарық Сұлтанұлы, көкшетаулық жас ақын Мерген Тоқсанбай, балуан Айдар Махметов, тарихшы мұғалім Арман, сондай-ақ дәрігер Қайрат бірнеше күндік сапарда еліміздің көрнекті орындарымен танысты.
Былтырғы жылы Ұлы Абай бабамыздың 175 жылдық мерейтойы аясында жоспарланған бұл сапар пандемияға байланысты шегеріліп, биыл жүзеге асып отыр. Төрт облыстың шекарасын басып, көздеген жерге жеткенше Ұлы Абайдың өлеңдерін, қара сөздерін, өсиетін насихаттау басты мақсаттары болғандығын экспидиция мүшелері зор мақтанышпен айтты.
Мың шақырымдық сапар барысында қазақтың қонақжайлығын, құрметін көргендіктерін жарыса жеткізді. Жол-жөнекей тарихи жерлермен танысып, рухани азыққа байып келгендері тебірене сөйлеген сұхбаттарынан сезіледі. Жолаушылар Кереку жеріндегі Мәшһүр-Жүсіп баба басына түнеп, ғибратты әңгіме тыңдап, Олжабай батыр, Едіге би, Бұқар жырау бабаларға тәу етіп, Қоянды жәрмеңкесі, Сұлтанмахмұт Торайғыров музейінде болып танымдарын тереңдетіп, тарихтан тағылым алғандарын айтты.
Қарқаралыдағы Құнанбай мешітінде аялдап, дана-данышпан бабаларға құран бағыштатып, қарадан шығып хан атанған Құнанбай бабамыз жайлы тың деректерге, тарихи шындыққа қаныққандарын ауыз толтырып мақтанышпен жеткізді.
19 күнге созылған сапар Жер кіндігі Жидебайға келіп, мәресіне жетті. Сегіз сері боп жолға шыққан аттылардың үшеуі жұмыс бабымен, әлдебір себептермен жол ортадан қайтқан екен. Жидебайға келген меймандарды абайлықтар құшақ жая қарсы алды. Сапар иелері көз тоймастай көрікке ие болған Жидебайды тамсана тамашалап, аруақтарға құран бағыштады. Жидебай басында бел жазып, ауқаттанып, шөл басқан серілер көздеген мақсаттарына, армандарына жетіп әсем әуезді әнге басты.
Ұлттық құндылығымызды дәріптеп, алты алашты таң қалдырған салт аттылардың бұл сапары көпке үлге, өскелен ұрпаққа теңдесіз өнеге.
Нұрқыз МЫРЗАХАНОВА, «Семей таңы»
