Екінші Алтын адам табылған Тарбағатай ауданындағы Елеке сазы жайлауында «Көкжыра» өндірістік кооперативі ұжымының төл тойы болып өтті. Қазақстан тәуелсіздігіне 30 жыл, осы кооперативтің құрылғанына 25 жыл толуына арналға бұл той қазіргі сақтық шаралары талаптарына лайықталып, жинақы болғанымен қарапайым еңбек адамдарының абырой-беделін асқақтатып, көпшілікке көтеріңкі көңіл-күй сыйлады.
Төл тойында Тарбағатай ауданы әкімнің орынбасары Қайрат Мауадинов құттықтау сөз сөйлеп, жиналған көпшілікке аудан басшысының сәлемін жеткізіп, кооперетив басшысы Бағдат Әшімұлы Сағынаевтың кеудесіне Тарбағатай ауданының Құрметті азаматы төсбелгісін тақты. Қайрат Мауадинов сонымен қатар өндіріс озаттары Серік Көлбаев, Қапшүкір Сатин және Қабылғазы Құдышевқа «Тарбағатай ауданының әлеуметтік-экономикалық дамуына сіңірген еңбегі үшін» медалін тапсырды.
Соңғы жиырма бес жылда өндірістік кооператив талай-талай өркендеу кезеңдерінен өтіпті. Өндіріс мамандары Алматыдағы Медаубеков атындағы ғылыми-зерттеу институтының ғалымдарымен бірлесе еңбек етіп, мал тұқымын асылдандару бағытында игілікті табыстарға қол жеткізіпті. Соның нәтижесінде жаңа аққарабас қой тұқымы қалыптасып, тұрақты түрде табыс келтіре бастапты.
Кооператив төрағасы Бағдат Әшімұлы еңбек ұйымдастыруда, азаматтардың табысқа талпынысын қолдап, өз ісіне деген сенімін нығайтып, ынтасын қалыптастыруда тың тәсіл қолдана бастапты. Мысалы, еңбектің көлемі, сапасы, бағалануы деген бар. Осы тұста кооператив басшылары өзінше ізденіс жасап, шешімін тауыпты. 650 гектар табиғи шабындық жердің шөбін бұрын екі айда әрең шауып бітіреді екен. Енді сол жердің шөбін бар-жоғы 22 күнде шауып алуға қол жеткізіпті. Қалай дейіз ғой? Мысалы, 50 гетар шабындықты екі күнде шауып бітірсеңіз сізге белгіленген мөлшерден екі есе артық еңбекақы төленеді. Бітті. Жаңа тәсіл белгілі-белгісіз сылтаулармен ақталатын бос жүріс-тұрысты, жұмыс барысындағы мың сан сылтауларды азайтыпты. Осы тәсіл өндірістің барлық саласының дамуына, сәйкесінше еңбек адамдарының табысының артуына елеулі ықпал етіпті. Кооперативте 1200 гектар жоңышқа алқабы бар. Былтыр егілген 100 гектар жоңышқаның әр лектарынан 33 центнерден өнім алынып отыр.
Тойда игі тілік көп айтылды. Мақтау қағаздарымен марапттталып, сыйлық алып жатқандарда да есеп жоқ. Осы өңірдің тумасы, дүниежүзілік қазақ күресі федерациясының вице-президенті Бәделхан Камалханұлы, Тарбағатай аудандық ауыл шаруашылығы бөлімінің басшысы Бейбіт Сербатыров, Көкжыра ауылдық округінің әкімі Ғабит Атыханов және басқалар құттықтау сөз сөйлеп, еңбек тойына жиналған жамағаттың еңбегіне табыс тіледі. Белгілі айтыс ақыны, мәдениет қызметкері Дулат Шідерин жырдан шашу шашып:
-Қонама еңбек қылмай жатқанға бақ,
Жаз жайлау көркің әсем, қандай ғажап,
Ассалаумағалайкум баршаңызға,
Тау төсінде мал бағып жатқан қазақ,- дей келіп, дала еңбеккерлерін, өндіріс озаттарын жеке-жеке жырға қосып:
Екпіндеп еңбектерің өрге жүзсін,
Қызмет жасай беріңдер ел, жер үшін.
Жер астында болмайды алтын адам,
Алтын адам тірі жүрген өздеріңсің,- деп тойға жиналған қауымды қуанышты сәттерімен құттықтады. Төл тойында Ақсуат Мәдениет үйінің өнерпаздары концерт қойды. Тойшыл қауым 25 шақырымдық ат бәйгесін, қазақ күресінен жас балуандар белдесуін тамашалады.
Хамза СӘТИЕВ, «Семей таңы»
