Семейдегі ақпарат орталығында ерекше басқосу өтті. Онда БАҚ өкілдері назарына Абайдың реставрацияланған жинағы ұсынылып, осы бағытта жүргізілген жұмыстардың мән-жайы түсіндірілді.
Баспасөз мәслихатын өткізуге қаладағы Абай мұражайы мұрындық болған. Абай мұражайының қызметкерлері хакімнің 1909 жылы Санкт-Петербургте жарық көрген тұңғыш кітабын таныстырды.
– Ең алғаш рет 1909 жылы Абай қайтыс болғаннан кейін оның алғашқы жинағы жарық көрді. Кітаптың шығуына оның ұлы Тұрағұл, жиені Кәкетай және белгілі қоғам қайраткері, «Алаш» партиясының көшбасшысы Әлихан Бөкейханов атсалысқан. Жинақ Нұр-Сұлтандағы Қолжазбалар және сирек кітаптар ұлттық орталығында қалпына келтірілді. Орталық өкілдері бізге көрмемен келген кезде біздің музейдегі осы бірегей жинақты көрген еді. Содан соң оны қалпына келтіру туралы шешім қабылданды. Кітапта титулдық бет жоқ, кейбір беттер жоғалып, жыртылған. Кітап қайта қалпына келтіріліп, түптеліп, мұражайға жаңа, қатты мұқабамен оралды, – деді Абай музейі директорының орынбасары Мейрамгүл Қайрамбаева.
Абайдың алғаш жарық көрген бұл кітабы 120 беттен тұрады және де «Халық туралы», «Махаббат туралы», тағы басқа да тақырыптармен тарауларға бөлінген. Жинақта Абайдың жүзге жуық шығармасы бар. Кітапты қалпына келтіру арзан емес. Осындай бір кітапты қалпына келтіру үшін жарты миллионға теңгеге жуық қаражат қажет. Алайда мұражайға арналған бұл жинақ тегін қалпына келтірілді.
– Бізге Нұр-Сұлтан қаласының Қолжазбалар және сирек кітаптар ұлттық орталығы қолдау көрсетті. Біз олармен бірлесіп іс-шара, көрме өткізген болатынбыз, оның аясында оларға осы жәдігерді көрсеттік. Бұл Абай шығармаларының алғашқы басылымы болғандықтан, орталық мамандары бізді қолдап, кітапты тегін реставрациядан өткізіп берді, осындай сыйлық жасады. Олардың біздің мұражайға деген қызығушылықтары жоғары, өйткені бізде құнды кітаптар мен қолжазбалар көп. Орталық біздегі кітаптар мен қолжазбаларды цифрландырып, өз қорларын цифрланған нұсқамен толықтырады да, бізге қайтарып береді. Бұл өзара тиімді жұмыс әрі қарай жалғасатын болады. Қайта шығарылатын кітаптар өте көп. Алда сандық форматқа көшірілуі тиіс тағы қырықтан астам кітап бар, – дейді Мейрамгүл Қайрамбаева.
Баспасөз мәслихатында сонымен қатар Алаш арыстары музейінде жүргізіліп жатқан жөндеу жұмыстары туралы да айтылды.
– Біздің музейдің облыс бойынша сегіз филиалы бар. Биыл Абай музейінің өз қаражатына Шәкір Әбенов және Көкбай ақын мұражайларында реставрациялық жұмыстар жүргізілді. Сондай-ақ Алаш арыстары мұражайында да жөндеу жұмыстары жүргізілуде. Бұл маңызды тарихи ғимарат болғандықтан, біз министрлікке бардық. Содан кейін олар қаржы бөліп, қалпына келтіру жұмыстарын қолға алды. Қазір біз министрлікпен жаңа материал ұсыну туралы ақылдасып жатырмыз. Жаңа экспозиция ашуды жоспарлап отырмыз, себебі бұрынғы экспозиция ескірген, – деді аталмыш бағыттағы жұмыстар жайын сөз еткен Абай музейінің директоры, белгілі ғалым Тұрдықұл Шаңбай.
Сөз соңында айта кетсек, қазіргі таңда Алаш арыстары мұражайының құнды кітаптарын цифрландыру және қалпына келтіру жұмыстары жүргізіліп жатыр.
Өз тілшіміз
