Өткен аптада облыс әкімі Даниал Ахметов жұмыс сапарымен Шемонаиха ауданына барды. Бұл туралы аймақ басшысы өзінің әлеуметтік желілердегі жеке парақшасында жазды.
Сапар барысында Даниал Кенжетайұлы аудандағы бірқатар нысандарды аралап, олардың жұмысымен танысты.
Аймақ басшысы Первомайск ауылында «Шығысауылшаруашылықөнімі» кәсіпорны табысты жұмыс істеп жатқанын атап өтті. Онда майлы тұқымдарды өңдейтін жаңа өндіріс ашылды. Қуаты жылына жүз мың тоннаға дейін май өндіруге мүмкіндік береді, кәсіпорында 305 адам жұмыс істейді. Және де аталған серіктестік облыстағы басқа шаруа қожалықтары үшін тауар өткізу нарығы болып отыр, өйткені ол өзін шикізаттың бір бөлігімен ғана қамтамасыз етеді. Бұл табысты өндіріс күнбағыс өсірумен қатар, оны терең өңдеуге де бағытталған.
Облыс әкімі Шемонаиха қаласындағы гуманитарлық-техникалық колледждің негізінде салынып жатқан мектеп-гимназияның құрылысын барып көрді.
— Бұл жеке спорт алаңдары, бассейні және үлкен акт залы бар тұтас оқу кешені болмақ. Колледж біздің ірі кәсіпорындармен белсенді жұмыс істейді және түлектердің 87 пайызы жұмысқа орналастырылды. Біз өз тарапымыздан жаңа гимназияға мемлекеттік тапсырыс беруге дайынбыз,- деді Даниал Кенжетайұлы.
Облыс басшысының айтуынша, күрделі жөндеуден өткен Шемонаиха мен Усть-Таловкадағы өнеркәсіп алаңдары мен тұрғын үйлерді жылумен қамтамасыз ететін «Шығысэнерго» қазандығы жұмыс істеуде.
— Басшылық қатты отын жеткізуге көмек сұрады, біз көмектесуге дайынбыз. Мен өз кезегінде ескірген құрал-жабдықтарға назар аудардым. Жақын арада біз Глубокоеде салынған сұйық отын жағатын жаңа типті қазандықты таныстыратын жиналыс өткіземіз,- деді аймақ басшысы Даниал Ахметов.
Облыс әкімі ауданда орналасқан «KAZminerals» компаниялар тобына қарасты «Шығыстүстімет» ЖШС Артемьевск өндірістік кешенінің екінші кезегінің құрылыс алаңында болды. Кен орнының қоры 2036 жылға дейін сақталады, жоба 2022 жылы іске қосылады.
Жұмыс сапары соңында Даниал Ахметов мұндағы ең заманауи сүт фермасы «Рулиха» ЖШС-да болды. Аймақ басшысының айтуынша, мұнда ыңғайлы қоршаулар мен сиырларды автоматты үш рет сауу жүйесі ғана емес, сонымен қатар жануарлардың ауруын анықтауға мүмкіндік беретін құрал-жабдықтар да бар.
— Мұндай ақылды технологияларды мал шаруашылығына енгізу ауыл шаруашылығы саласына экономикалық нәтиже беретіні сөзсіз,- деп атап өтті аймақ басшысы.
Өз тілшіміз
