Семей өңірінде коронавирустық инфекцияның алдын алу мақсатындағы ревакцинация шаралары қарқынды жүргізіле бастады. Бүгінгі таңда Семей қаласының №1 емханасында қала тұрғындарының 60 пайызға жуығы қайта вакцинациядан өткен. Бұл туралы апта сейсенбісінде қалалық ақпарат орталығында өткен онлайн-брифинг барысында хабарланды.
Баспасөз мәслихатында Семей қалалық №1 емханасының инфекционист дәрігері Гүлнар Сахаритова мен осы емдеу мекемесінің жалпы тәжірибелік дәрігері Арайлым Құдайбергенова ревакцина жайында кеңінен тарқатып айтып берді.
— Әлемде коронавирустың жаңа, мутацияланған «омикрон» штамы таралуда. «Омикронның» басқа штамдардан ерекшелігі — оның инкубациялық кезеңі қысқа мерзім ішінде өтеді және ол өте жоғары деңгейдегі жұқпалы вирус. Орташа алғанда, инкубациялық кезең бір күннен үш күнге дейін жалғасады. Ал басқа штамдарда — жетіден он төрт күнге дейін. «Омикрон» басқа вирустарға қарағанда жеті есе жұқпалы және тез таралады. Белгілері — жөтел, шаршау, летаргия, мұрынның бітелуі, мұрыннан су ағу, қалтырау. Коронавирустың бұл түрімен жастар мен балалар да ауырады. Дәм мен иіс сезу жоғалуы сирек кездеседі. ДДСҰ мәліметтері бойынша, «омикрон» жоғарғы тыныс алу жолдарына әсер етеді. Сондықтан ол ЖРВИ мен тұмауға ұқсас, — дейді Семей қалалық
№1 емханасының инфекционист дәрігері Гүлнар Сахаритова.
Айта кетерлігі, ревакцинация тек бір кезеңдік шара. Ол вакцинацияның толық курсын алғаннан кейін алты айдан кейін жүзеге асырылады.
— Ревакцинация медициналық пункттерде жүргізіледі. Көшпелі бригадалар да жұмыс істейді. Ревакцинация алдында пациентті қарап, температурасын өлшейміз, содан кейін ем шараға рұқсат берілді. Екпенің толық курсын алған жүкті әйелдер де қайта вакцинадан өтеді. Жүкті әйелдерге ревакцинация кезінде Pfizer вакцинасы салынады. Ал жалпы ревакцинация QazVac және Ver Cell екпелерімен жүргізіледі. Бүгінгі таңда біздің емханада халықтың 60-70 пайыздайы қайта вакцинациядан өтті, — деді Семей қаласының №1 емханасының жалпы тәжірибелік дәрігері Арайлым Құдайбергенова.
Брифинг соңында спикерлер қала тұрғындарын ревакцинацияға шақырып, бүгінгі таңда коронавирустық инфекциядан қорғанудың ең тиімді құралы тек екпе алу екенін де баса атап өтті.
Айта кетейік, облыс басшысы Даниал Ахметов денсаулық сақтау басқармасына медициналық қызметкерлерді мүмкіндігінше тезірек қайта вакцинациялауды тапсырды.
— Медициналық жабдықтарды жеткізуші компания өкілдерімен келіссөздер жүргіздім. Осы ретте реанимациялық төсек орнын 500-ге дейін арттыратын боламыз. Облыста дәрі-дәрмектер мен жабдықтардың қажетті қоры бар.
Қазіргі таңдағы басты мәселе — балаларымызды, жас аналарды және жүкті әйелдерді Pfizer препаратымен вакцинациялауды жалғастыру. Бұл өте маңызды. Тәжірибе көрсеткендей, тек вакцинация вирустың таралуына қарсы тұра алады,- деп жазды облыс басшысы Даниал Ахметов инстаграм әлеуметтік желісіндегі жеке парақшасында.
Шығыс Қазақстанға қосымша 62 мың доза вакцина жеткізілген және ревакцинация үшін тағы 120 мың доза қажетті препараттар бар. Барлық егу пункттері штаттық режимде жұмыс істеп тұр.
— Медициналық тәжірибе көрсеткендей, вакцинацияланбаған пациенттерде коронавирус ауыр түрде ауырады, сонымен қатар олар ауыр постковидті синдромға ие. Сондықтан КВИ вакцинациясы тіпті ауыратындарға да ұсынылады. Сіздерден барлық қажетті санитарлық нормаларды сақтауларыңызды сұраймын. Тек осылай ғана біз инфекцияның таралуына жол бермейміз,- деп жазды аймақ басшысы.
Әлібек КЕМЕЛХАН,
«Семей таңы»
