Облыс әкімі Даниал Ахметов апта ішінде ауыл шаруашылығын дамыту мәселесі және «Еңбек»бағдарламасының жүзеге асырылуы жөнінде жиындар өткізді.
Облысымыз ауыл шаруашылығы саласында жақсы нәтижелерге жетіп отыр. Бұл туралы аймақ басшысы ауыл шаруашылығын дамыту мәселесі қаралған жиында атап өтті.
– Бізде 63 сүт-тауарлы фермасы жұмыс істейді, олардың екеуі өткен жылы пайдалануға берілген болатын. 3 сүт қабылдау пункті бар, алдағы уақытта тағы екі пункт ашу жоспарда. Атқарылған жұмыстардың арқасында 2021 жылы тұрғындардан 63 мың тонна сүт сатып алынды, фермерлер болса 106 мың тонна сүт өндірді, бұл жақсы көрсеткіш,- деді Даниал Кенжетайұлы.
Шаруалар элиталық асыл тұқымды мал өсіруге баса назар аударып отыр, бұл – құптарлық жағдай. Атап айтқанда, «Багратион» компаниясы 300 басқа арналған сүт-тауарлы ферма ашуды жоспарлап отыр.
Жиында облыс әкімі аудан әкімдеріне ауылшаруашылық кооперативтеріне бірігу мәселесін анықтауды тапсырды. Субсидия беру мәселесін де мұқият қарастыру қажет. «Егер жем-шөп базасы жеткіліксіз болса, мұндай шаруашылықта мал шаруашылығын субсидиялау бекер іс. Барлығын мұқият зерттеп, есептеу керек. Оның үстіне, қазір біз жайылымдық жерлерді тікелей пайдалануға қайтару бойынша белсенді жұмыс жүргізіп жатырмыз. Агросектор әрдайым басым бағыт болары сөзсіз. Тек қаражатты тиімді пайдалана білуіміз шарт»,- деді облыс басшысы.
«Еңбек» бағдарламасы үш бағыт бойынша жүзеге асырылады: кадрларды оқыту және даярлау, несиелендіру, гранттар бөлу және жұмысқа орналастыру. Аймақ басшысы бірінші бағыт бойынша өңірде ірі кәсіпорындармен ынтымақтастықта ашылған құзырет орталықтары өздерін жақсы көрсете білгенін атап өтті.
– Бұл колледж түлектерінің 90 пайызын жұмысқа орналастыруға мүмкіндік береді. Несиелеуге келетін болсақ, көп балалы және аз қамтылған отбасылар тиімді шарттармен – төрт пайызбен несие алып, өздерінің шағын бизнесін бастады, – деді Даниал Кенжетайұлы.
Өтеусіз гранттарды 2275 отбасы жеңіп алды. Үшінші бағыт аясында әлеуметтік жұмыс орындары құрылады.
Облыс әкімінің айтуынша, еліміздің еңбек күші артық өңірлерінен қоныс аудару жөніндегі «Оңтүстік – Солтүстік» республикалық бағдарламасы ерекше бақылауға алынған. Біздің облысқа 2017 жылдан бастап 3598 адам көшіп келген, алайда барлығы жұмыс істейтін аудандарға қоныстанбады. Сондықтан облыс басшысы қалалар мен аудандардың әкімдеріне қоныс аударған әрбір отбасының қайда жұмыс істейтіні, қандай жағдайда тұратыны туралы егжей – тегжейлі есеп дайындауды тапсырды.
– Адамдарды кепілдікпен жұмысқа орналастыруға және оқуға қол жеткізуді қамтамасыз етуге болатын жерге көшіру керек деген түсінік болуы тиіс. Ол үшін бізде құзыреттілік орталықтары ашылған, – деді аймақ басшысы.
Алдағы уақытта «Еңбек» бағдарламасы аясында Бақыршық тау – кен өндіру кәсіпорны мен «KAZminerals» компаниялар тобының қолдауымен Шар қаласында тағы бір құзыреттілік орталығын ашу жоспарланып отыр.
Өз тілшіміз
