КӨШЕ ТАЗАЛЫҒЫНА КӨҢІЛ БӨЛУ ҚАЖЕТ
Жолдардың қызмет ету ұзақтығы, қозғалыс қауіпсіздігі мен жайлылығы олардың күтіп ұсталуына байланысты екені белгілі. Өткен аптада қала басшысы Бақытжан Байахметов тиісті сала басшыларымен бірге шаһарды аралап, қалаішілік жолдардың күтіп ұсталуын тексерді.
Қала көшелерін күтіп ұстауға жауапты мердігер ұйым «Зеленострой» ЖШС-да 28 бірлік жол техникасы бар. Дегенмен қала әкімі атап өткендей, жүргізіліп жатқан жұмыстардың сапасы нашар: жолдар мен тротуарлар лас, шаң басып жатыр. Сондықтан мердігер мекемеге дүйсенбіден бастап қала көшелерін тазалау жұмыстарын жеделдетіп, техника мен суару — жуу машиналар санын арттыру, ал жолаушылар көлігі және автомобиль жолдары бөліміне күнделікті орындалатын жұмыстарға бақылауды ретке келтіру тапсырылды.
— Бір апта ішінде көшелер мен жолдарды ретке келтіру керек, содан кейін ағымдағы жөндеу жұмыстарына кірісуге болады, — деді Бақытжан Кәкенқажыұлы.
Сондай-ақ коммерциялық ұйымдардың өздерінің нысандарына іргелес аумақтарда абаттандыру және тазалық жұмыстарын жүргізуін ұйымдастыру қалалық сәулет және кәсіпкерлік бөліміне тапсырылды. Яғни енді семейліктер сенбіліктер ұйымдастырып, көшелерді, мекемелер аумақтарын тазалауға кірісетін болады.
Сөз орайында айта кетелік, Семей қаласында ағымдағы жылы 60,6 шақырым жол орташа жөндеуден өтеді. Қала әкімдігінің мәліметіне сүйенсек, соңғы үш жылда көлік-логистикалық инфрақұрылымды жақсартуға 11 млрд теңгеден астам қаражат жұмылдырылған. Жалпы көше тазалығы көшелерді жөндеумен қатар жүргізілуі тиіс.
«Биыл 60,6 шақырым жол орташа жөндеуден өтеді. Көлік кептелісін азайту мақсатында Шығыс кентіндегі Өскемен көшесін кеңейту жұмыстары басталады. Сондай-ақ жаңа мешіттің оңтүстік жағына 133,2 млн теңгеге екінші жер үсті жаяу жүргіншілер өткелін салу көзделіп отыр», — дейді шаһар басшысы Бақытжан Байахметов.
Оның айтуынша, қаладағы көлік көпірін жаңғыртуға 31,3 млрд теңге қажет. Жоба салалық министрлікке республикалық бюджеттен қаражат бөлу үшін жіберілген.
Ал бүгінгі таңда осыған дейін айтып өткеніміздей, жолдағы қауіпсіздік деңгейін арттыру үшін «Сергек» фотобейнетіркеу жүйесін іске қосу жұмыстары жүргізіліп жатыр.
Әлібек КЕМЕЛХАН,
«Семей таңы»
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
