БАС ИМАМ ӘКІМНІҢ ҚАБЫЛДАУЫНДА
Жуырда Семей қаласының әкімі Бақытжан Байахметов Семей қалалық Абай Құнанбайұлы атындағы орталық мешіттің және де ҚМДБ-ның Семей аймағы бойынша бас имамы Асқар қажы Әбітайұлымен кездесті.
Өңірдің бас имамы қала әкіміне алдымен орталық мешітте жүргізіліп жатқан рухани және қайырымдылық шаралар туралы айтып өтті.
Асқар Әбітайұлы:
– Өңіріміздегі мұқтаж отбасыларға көмек көрсету, әлеуметтік мекемелер үшін қайырымдылық шараларын ұйымдастыру сынды ізгілікті істерді үздіксіз жүргізіп келеміз. Сонымен қатар жат ағымдарға қарсы насихат жұмыстарыда жүйелі түрде атқарылып жатыр, – деп атап өтті бас имам.
Жергілікті дін өкілдері өңіріміздегі діни ахуалдың тұрақтылығы мен әлеуметтік мәселелердің шешілуіне де өзіндік үлес қосуда.
Қала әкімі Бақытжан Кәкенқажыұлы өз сөзінде жаңадан салынған мешіттің бүгінгі таңдағы ахуалы туралы және де қажетті құралдармен жабдықталуы туралы сұрап, бас имаммен бірқатар мәселелерді талқылады.
Сұхбат барысында Орталық мешітке мүмкіндігінше қолдау көрсетілетінін айтқан қала басшысы Бақытжан Кәкенқажыұлы бас имаммен ұлттық құндылықтар мен рухани тәрбиені насихаттау, дамыту бағытында бірлесіп қызмет атқаратындығын жеткізіп, бірқатар шаралар өткізу жайында өзара келісті.
Асқар Әбітайұлы асыл дінімізге жанашырлығы үшін қала әкіміне семейлік дін қызметкерлерінің атынан алғыс білдірді.
Әлібек КЕМЕЛХАН,
«Семей таңы»
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
